Perintah BN seruran siru sereta mentas enggau rayat: Masir
SRI AMAN: Perintah seruran deka nyaup rayat ti dituntung penusah enda ngira bansa enggau jalai pengarap, pia ku Kaban Parlimen Sri Aman, Masir Kujat (gambar).
Ku iya, nengah bantu ke diulurka nya mandangka perintah Barisan Nasional (BN) perintah ti siru sereta mentas ati mutarka penusah ke nuntung rayat.
Berindik ari nya, genap bantu ti diulurka perintah, patut diterima enggau ati ke tebuka sereta lurus lalu bantu ke diberika nya mega enda patut dibasau sengapa.
Masir bejaku munyi nya lebuh nyuaka Tangki Air, Pemeri ari Opis Mineral enggau
Geosains Malaysia Pampang Sarawak sereta mega nyuaka Hamper Pemeri ari Opis Pemansang Raban Bansa (KEMAS) Menua Sarawak ngagai mensia mayuh ba Rumah Jegai Jawa, Purai Undop, Sri Aman ti dituntung penusah angus, apin lama ti udah ditu, pagi ensana.
Berebak enggau nya, Masir mega arapka mensia mayuh ari rumah panjai 17 pintu ke retung empa api kena ujung bulan November nyin tadi anang kelalu tusah ati berundingka penusah ti udah ninggang sida.
“ Aku arapka kita ba rumah panjai tu anang kelalu tusah ati laban aku ke nyadi pengari rayat begulai enggau sekeda ijnsi perintah sereta gerempung ukai dikuasa perintah (NGOs) Sri Aman nguji ngulurka bantu ngagai mensia mayuh ba rumah panjai tu ngambika kita ulih ngaga rumah panjai baru udah tu ila,” ku iya.
Beserimbai enggau nya mega, Masir nyuaka ungkup belanja RM 20,000 ngagai Komiti Pemansang enggau Pengelikun Genturung Pendiau (JKKK) Rumah Jegai Jawa, Purai ngambika bisi dikena sida ngerataka tanah endur sida ngaga rumah panjang baru.
Direktor Opis Mineral enggau Geosains Sarawak, Alexanda Unya Ambun ngena awak nya nyuaka tangki ai ke beungkus RM 47,000 ungkup rayat ba rumah panjai ke dituntung penusah nya sereta RM 3,000 ungkup JKKK Rumah panjai nya.
Opis Pemansang Raban Bansa (KEMAS) Sarawak nengah KEMAS Sri Aman meri 20 iti hamper pemakai ngagai sida ke dituntung penusah nya.
Sama bisi ngulu pengerami nya, Sapit Direktor KEMAS Sarawak, Mohd Azrul Aidi Philip Abdullah, Sapit Residen
Pelilih Sri Aman, Felicia Tan Ya Hua, raban ari Opis Mineral enggau Geosains Sarawak, KEMAS Sarawak, bala tuai rumah ba kandang menua Ulu Undop enggau orang ari rumah panjai ke bukai.