MIRI: Raban nembiak patut regas nyikap diri enggau penemu sereta pengelandik.
Kaban Kunsil Nengeri (ADUN) Lambir, Ripin Lamat minta raban nya nampung pelajar sida ngagai institusi pengelandik ti disediaka perintah.
“Mayuh amat institusi pengelandik ti ditumbuhka ba kandang menua Miri tu ungkup nembiak lebih agi dalam bidang pengelandik,” ku iya ba Pengerami Mantar-Krismas 1Malaysia ba Balai Raya Bukit Kisi empai lama ke udah.
Sama bela bisi bejaku ba pengerami nya Kaban Parlimen Sibuti, Ahmad Lai Bujang, Tuai Rumah (TR) Busang Braoh, TR Midul Sewi, TR Jumat Aji enggau TR Gan Musang.
Ku iya, rambau ke agi biak tu, nembiak patut disikap enggau mayuh bengkah pengawa ti nguntungka sida, lalu ukai dibasau baka nya aja.
“Pengidup kita jemah ila enggau peluang deka manah, nya alai anang nempaya pengidup kita ke biak diatu,” pia ku jaku lalau iya.
Ku iya, ambika chunto padang futsal ke digaga nya ungkup keempat-empat rumah panjai ba kandang menua nya nyadi palan endur ngansah pengelandik diri.
‘Enti sema bemain sereta rajin belatih bemain bol tauka futsal, aku bisi endar pengarap ati bisi antara kita ulih ngarika menua Sarawak tauka menua Malaysia ba main nya,” ku iya.
Beserimbai enggau nya, Ripin minta mensia mayuh ba menua nya nyukung perintah ke diatu tauka Barisan Nasional (BN) ngambika pemansang ulih majak dikerembaika.
Berebak enggau nya iya meri 500 unit kerusi ungkup balai raya nya sereta ngemendarka bantu dikena ngemanahka balai raya nya.