KUCHING: Nengah pengawa numbuhka koperasi sebengkah jalai kena mantu pesereta patut dikemeranka lalu dikemeratka Land Custody and Development Authority (LCDA) ti ngemansangka tanah Adat Bansa Asal (NCR) nengah konsep baru.
Menteri Muda Pemansang Tanah, Datuk Abdul Wahab Aziz bepenemu koperasi nya ulih mantu ngemaju sereta ngemansangka pengawa dagang enggau chakah.
Iya mansutka pekara ngagai raban pesereta ti ngemansangka tanah sida enggau DD Pelita Sebungan Plantation, Bintulu.
“Kita (pesereta ti ngemansangka tanah sida enggau DD Pelita Sebungan Plantation, Bintulu) patut numbuhka siti koperasi enti bedau bisi. Pekara tu tau diperundingka kita enggau sida LCDA ( Land Custody and Development Authority).
“Nengah koperasi tu ila kita ulih ngatur manah agi pekara bekaul enggau pengangkut, chara nanam sawit enggau ke bukai.
“Perambu tu enda tau enda diperundingka enggau LCDA ngambika sama maju dalam pengawa ngemansangka kebun bedandang besai, baka kelapa sawit,” ku iya magi penemu.
Iya bejaku ba pengerami nyain sempekat (MOU) Usahasama Projek NCR Selepin-Bakong, Miri enggau pengawa nyuaka deviden ngagai Peserta Projek Pelita Sebungan Plantation, Bintulu , ngarika Menteri Pemansang Tanah Tan Sri James Masing, ke diatur LCDA ba Hotel Pullman ditu, pagi kemari.
Berebak enggau tu iya madahka, polisi perintah Barisan Nasional bekaul nyukat tanah NCR endang nadai bechiping.
Iya madahka perintah ukai deka ngemediska rayat tang ngambika rayat bisi garis entara tanah enggau pangan diri sereta bisi surat pala tanah.
Udah disukat sereta bisi surat pala tanah, sida ti beempu tanag nbya ulih ngemansangka tanah nya empu tauka ngasuh kompeni, ku iya.
“Nya alai, aku ngelalau semua rayat ngambika enda charut enggau pangan diri , lebuh sida ari opis tanah enggau survey deka nyukat kelilingi pemesai tanah, laban nya tau ngenanggul pengawa nyukat,” ku iya.
Kena ke 19 November 2003, Pelita Holdings Sdn Bhd enggau DD Plantation Sdn Bhd nyain Joint Venture Agreement lalu numbuhka Joint Venture Company (JVC) ke diberi nama DD Pelita Sebungan Plantation Sdn Bhd.
DD Pelita Sebungan Plantation Sdn Bhd ngemansangka urung 10,000 hektar pemesai tanah NCR ba Sebungan Sebauh, Bintulu nengah konsep baru ngemansangkah tanah NCR.
Asil JVC nya, penyampau dividen tengan taun 2011 iya nya RM1.5 miliun dibagi ngagai 779 orang ti beempu tanah NCR ke mungkur 25 bengkah rumah panjai.
Menijer Besai Pelita Sdn Bhd Abdullah Chek Sahamat enggau menijer Besai DD Plantation Sdn Bhd Datuk Yee Ming Seng enggau bala peserta.