SIBU: Adat enggau pengarap asal bansa Iban deka punas enti sema nadai chara digaga kena ngetan sereta nyaga pengeraja asal nya berengkah ari diatu.
Lemambang Awang Uju ari Nanga Entuat, Sungai Katibas, Song mantaika buah runding nya maya betuaika Sandau Hari ke diatur ba rumah Anthony Bija Selat ba Lurung 2E/2, Taman Rimba, Bukit Lima ditu, apin lama tu tadi.
Ku iya madah, bai ubah enggau pemansang maya rama, adat enggau pengarap asal bansa Iban baka ke diatur maya sehari nya tau punas enti enda ditan sereta dipeturun ngagai nembiak rebak baru.
“Enti udah nadai tubuh kami (lemambang) tu, adat kitai Iban jemah ila tau punas. Nya alai, bala nembiak taja udah megai pengarap Kristian anang ngelengkaka pesaka aki ini kitai tu. Anang sanggu betanya ngagai kami ke tuai,” pia ku iya maya berandau enggau pengarang berita.
Ku iya, pekara ti nyadi batang kebuah pengawa asal baka nya jarang dikereja kemayahari tu laban tebal agi kitai bansa Iban nguan kandang mengeri.
Seraya ke muji pengawa Anthony ke ngatur Sandau Hari bepun ari mimpi iya (Anthony) empu, ku Lemambang Awang, taja pan natam ba mengeri, bansa Iban enda tau ninggalka adat nya laban kelimpah ari bai mimpi tang pengawa baka tu ulih dipandang ngagai nembiak baru ngambika siad nemu adat bansa diri.
Kelimpah ari nya, iya mega madah, perintah endang segi ngemeratka pengawa ngetanka adat baka tu tang kenu ku iya, baka sida gerempung ke bekaul lebih agi gerempung Iban ba nengeri tu, patut chakah agi besaup ngetan, nyadung lalu ngerembai adat enggau pengarap asal Iban ngagai nembiak maya hari.
“Kitai pechaya gerempung tauka serakup ulih bejalaika mayuh bengkah chara dikena mantai lalu mai nembiak rebak baru belajar sereta meretika adat bansa kitai.
“Taja pan baka nya, sida bekenaka turu enggau belanja, nya alai, besai amat pengarap baka kami ke tuai, perintah ulih mubuhka mayuh agi bantu ngagai sida dikena megai tanggung pengawa tu,” ku iya madahka baru.
Bela datai ngemataka pengawa Sandau Hari tu iya nya, Sapit Presiden Sarakup Dayak Iban Sarawak (SADIA) Munan Laja, Sapit Tukang Wang SADIA Ngalang Ajan, bala kaban belayan enggau sida ke bukai.