KUCHING: Menteri Pengawa Rumah ngelalau kompeni pemaju rumah ngambi nitihka atur spefikasi tauka langkar ti ditetapka kunsil kandang menua kena nyeliahka penusah bah.
Menteri iya Datuk Amar Abang Joharai Tun Openg madahka nya nyengkaum sistem parit enggau entali ai. Iya madahka enti kompeni pemaju rumah nitihka spefikasi nya , dia penusah bah ba kandang rumah estet ulih diseliahka.
“Kitai minta kompeni pemaju rumah nitihka atur spefikasi ti udah ditetapka kunsil kandang menua, lebih agi bekaul enggau sistem parit enggau entali ai, kena nyeliahka penusah bah nyadi ba kandang rumah estet.
“Laban penusah bah tu tau nyadi ninting taun, nya alai ba pengawa berumah kitai chukup ngemeratka semua pekara nyengkaum sistem parit enggau entali ai.
“Pemaju rumah aruh besam-bung tauka begagaka parit nitih pelin ti ditetapka ulih raban injinir kunsil kandang menua,” ku Abang Johari ti mega nyadi Menteri Dagang Temuai.
Iya mansutka penemu nya lebuh dikerandau pengarang berita pengudah ngulu pengerami nyuaka Insentif Pelajar Nyulut 2011 Serakup Pengajar Bumiputera Sarawak (KGBS), ti diatur ba Merdeka Palace ditu, lemai kemari.
Abang Johari ti enda nyakal bisi sekeda kompeni pemaju rumah enda nitihka spefikasi kunsil kandang menua.
Ambika banding ku iya, ba sebengkah kandang rumah estet di Samarahan, penganyut ai parit enda ditemu penunga lalu nya tau ngasuh bah, ku iya.
Berebak enggau tu lebuh ti dipinta ngenang penusah bah ti nyadi ba mengeri Kuching, iya madahka mengeri Kuching kurang betapi enggau penusah bah.