Home - Utusan Borneo - Berita Iban - Fatimah: Jaku English aruh dikemeratka semua
Fatimah: Jaku English aruh dikemeratka semua
Posted on January 27, 2012, Friday
SARIKEI: Pengawa belajar, mereti sereta ngembuan pengelandik bejaku English aruh dikemeratka semua raban bansa di menua tu, diatu.
Tu lebih agi berat ba pengidup mensia ke nguan menua pesisir ke alai sida patut meransang anak ngambika landik bejaku English setipak enggau peminta dunya ke balat ngemeratka penau sereta pengelanchar seseiku ba jaku nya.
Kaban Parlimen Tanjung Manis Datuk Norah Tun Abdul Rahman madah, pengelandik tu mega endang dikemerat lebih agi lebuh sida kereja tauka nyambung pelajar ba tikas ke tinggi.
Ku iya, apai indai ke nguan menua pesisir patut meransang anak sida belajar jaku English ngambika sida muntang napi pemar pengidup sekalika begiga kereja ba kompeni luar tauka perintah kelimpah ari nyambung pelajar ba renggatk ke tinggi.
“Kitai enggai meda anak kitai tinggal laban orang bukai ketegal enda landik sereta muntat ba jaku English. Ari nya apai indai patut meransang anak diri ngemeranka matapelajar nya.
“Pengelanchar sereta pemereti ba jaku English tikas sekula primari enggau sekondari patut bendar dikemerat dikena ngemuntangka anak kitai besemekih ba sekula tauka renggat ke tinggi lebih agi lebuh begigaka pengawa puang ba opis perintah tauka kompeni luar,” ku iya.
Norah bejaku munyi nya lebuh ngabang nyerumba Taun Baru China ngagai Sekula Kebangsaan (SK) San Ming, Sare, ensana.
Pengerami nya mega digulu semua pengereja pengawa, nembiak sekula ari sekula nya sereta raban apai indai.
Iya mega madah, rayat ba menua tu betuah ketegal serumpu nyambut pengerami enggau likun.
“Tu berindik ari perintah ke landik nusun atur sereta pemintar pengari rayat Barisan Nasional (BN).
“Sebengkah ke ngasuh kitai temegah, rayat di menua tu ulih diau sereta bekunsi penemu lebuh ngerami sesebengkah pengerami.
“Kitai ngarapka taun tu menua kitai ulih nyapai pemujur sereta penegap ekonomi, sosial enggau ke bukai,” ku iya.
Bela bisi ngulu pengawa nya, Pemesai Opis Pelilih Mit Sarikei Abang Mohd Porkan Abang Budiman sereta bini iya, Temenggung Junia Olia, Penyanding Atur Pengawa sitak Parlimen P.206 Tanjung Manis Joslee Ramlie sereta ketuai raban bansa ke ngelingi.
<< Previous Entry - Next Entry >>
