Lot endur ngengkah kerita enda ngenusah mensia mayuh, ku Lo Khere Chiang

0

KUCHING: Opis Kunsil Kandang Bandar Padawan (MPP) nyamin bayar paking ke deka ditetapka ba palan dagang ba sitak ke dipegai sida iya enda deka ngenusahka mensia mayuh.

LOT PAKING BA PALAN DAGANG PADAWAN ENDA LAMA AGI: Lo ba aum media di opis MPP ensana.

Chairman opis nya, Lo Khere Chiang madahka atur sistem paking kupon tu ukai deka ngulihka penguntung tang mutarka penanggul penyekut jalai ke nyau majak ba palan dagang ke dipegai opis bekuasa kandang menua (PBT).

Iya madah, penyekut jalai alun ke nyadi ba palan komersial nya nyadi laban dipelaba ari ulah orang mayuh ke paking kerita sida iya ke enda nitih atur lalu diteju dia lelama.

“Penyampau bayar ke deka ditetapka kami sebaka enggau ke dichaj ulih PBT bukai baka Opis Kunsil Majlis Bandaraya Kuching Selatan (MBKS), Dewan Bandaraya Kuching Utara (DBKU) enggau Opis Kunsil Majlis Perbandaran Sibu (SMC).

“Bida iya semina sistem tu deka dipejalaika MPP empu ukai nengah kompeni ke dipadu kami,” ku iya madah ba aum media sepengudah bechairmanka aum penuh opis kunsil nya kemari.

Lo mega madah opis sida iya udah dipadah bekaul enggau pekara tu ulih pegawai ari SMC tu tadi.

Lebuh bejaku pasal sistem paking bekupon ke deka digaga ulih opis nya, iya madah ke diatu sida iya benung ngaga lot kerita lalu proses nya nyangka begunaka timpuh ke lama mimit laban iya mungkur agensi ke bisi bekait enggau pengawa nya.

Sistem nya ila nyangka deka belabuh dikena ujung taun tu lalu deka disengkaum sekali enggau palan komersial ke seruran betapi enggau penanggul penyekut jalai baka pasar Sungai Maong, Kota Sentosa, Bandar Baru Batu Kawah (MJC), Siburan enggau Kota Padawan.

“Orang mayuh patut beratika ngaga atur sistem tu manah sereta meri penguntung ngagai pengguna, ngambika sebarang penguntung ke di ulih nya ila, ulih di kena ngaga tauka ngemanahka agi perengka guna infrastuktur ngelingi sitak MPP.

“Enti nadai sebarang penanggul kami merambu deka ngaga palan paking kerita beringkat begunaka asil ari bayar paking nya ila,” ku iya.

Kelimpah ari nya mega ku iya, lebuh sistem nya ila diberi kelala, iya deka nyendiaka peluang pengawa ngagai orang mayuh ke deka gawa nyadi attendan enggau mandur paking.

Ba pemansang bukai, , Lo madahka JKR udah mayar RM960,000 ngagai Sesco kena sida iya ngaga 236 iti lampu jalai sepemanjai jalai Kuching-Serian belabuh ari Batu 11 ngagai Batu 15.

Iya madah masang lampu jalai nya deka digaga enda lama agi lalu tu nyadi berita ke manah ngagai semua orang ke ngena jalai alun nya.

Ba penanggul nadai lampu jalai ba Jalai Landeh semak ditu sepemanjai tujuh kilometer, Lo madah MPP udah minta ungkup ari JKR.

“Baka ke udah di temu kitai, isu lampu jalai ba Jalai Landeh sigi mayuh endar penanggul kelimpah ari enda dikeibuh ulih kompeni ke betanggung jawab sebedau tu , endur nya nyadi alai orang berusakka kereban rama.

“Kami ngarapka peminta nya deka di kemendarka enggau lengkas,” ku iya.

Sama bisi datai ba aum media nya, sapit chairman MPP Hasyim Yap enggau Sekretari Opis PMC Micheal Sawing.