Tuesday, August 9

ATM deka bebendar mantu veteran soldadu

0

ZULKIFLI

KUCHING: Raban Soldadu Malaysia (ATM) deka bebendar mantu pengidup veteran soldadu lebih agi sida ke idup di baruh garis penyeranta.

Panglima Soldadu Darat,Jeneral Datuk Zulkifli Zainal Abidin madah, nya nyengkaum ngaga rumah ungkup mensia mayuh nengah Opis Menteri Pemansang Menua Pesisir enggau Kandang Mengeri (KPLBW).

Ku iya, ba strategi laut biru ke baru raban soldadu mantu mensia mayuh ngaga rumah.

“Ungkup dikena kami ngaga rumah nya ari KPLBW. Kami nulung ngaga, aku ngarapka veteran soldadu  minta ngagai opis menteri nya (KPLBW),” ku iya.

Iya bejaku munyi nya ba pengerami betemu enggau Panglima Tentera Darat Begulai enggau Veteran ATM ditu, kemari.

Zulkifli madah, lebih 800 unit rumah udah digaga ti mungkur 1,000 raban soldadu dipejalaika ba Semenanjung Malaysia, Sabah enggau Sarawak.

“Aku lebih ngemeratka veteran soldadu bulih rumah tu,” ku iya.

Berebak enggau tu, iya ngarapka semua rumah veteran soldadu ngembuan ai paip.

“Aku ti nyadi Panglima Soldadu Darat, tentu berasai enda lantang sereta sinu enti rumah veteran soldadu nadai ai paip,” ku iya.

Bekaul tinda kontrak enggau pengawa ngemanahka kem soldadu enggau Kem Palan Pematih Pengawa Ke Bansa (PLKN), Zulkifli madah, nyemaka bisi veteran soldadu ke ngembuan lisin dikena bejalaika projek ngaga enggau ngemanahka kem tau ngenataika pemainta.

“Kitai patut nanya bakani prosedur enggau penyampau pemesai ke gawa. Lima ari enam bengkah projek diberi ngagai veteran soldadu.

“Veteran soldadu endang chukup dikemeratka,” ku Zulkifli.