Tuesday, August 9

Tanah ungkup projek dibayar pampas, ku Rayong

0

SELAMAT DATAI: Nyalau (tengah) enggau Rayong (dua kiba) dialu enggau kajat asal lebuh ke datai ba Rumah Empading, Bunu, Skrang.

Iya minta sekeda rayat ngemendarka tanah direnchah perintah ngambika ulih dikemansang

ENGKILILI: Bisi 51 iku penerima sepenyampau RM 145,598.60  mujur nerima chek pampas tanah ari perintah ke diatur ba rumah panjai Empading, Nanga Bunu, Skrang dalam pelilih mit Engkilili, apin lama tu tadi.

Pengawa mayar chek nya ungkup Projek Ngemanahka Jalai Nanga Bunu, ganti rugi utai tanam enggau pun buah ke diempu rayat enggau Projek Bekal Kuasa Karan Menua Pesisir Sistem Solar Hibrid di Rumah Dau, Entalau, Sri Aman.

Nyerumba enggau pengerami nya, Kaban Kunsil Nengeri (ADUN) Engkilili, Dr Johnnical Rayong Ngipa berasai enda lantang ati ba sekeda rayat ke enggai tanah sida direnchah perintah ungkup pemansang ba menua nya.

“Ulah ke baka nya patut dibuai laban perintah sigi ka mayar pampas ungkup tanah ke kena renchah nitihka rega kediatu enti sema tanah nya diambi perintah ungkup pemansang,” ku iya.

Kelimpah enggau nya mega, Dr Rayong ngelalau mensia mayuh ba menua tu ngambika enda mantaika isu tanah sida ngagai parti penyakal enti deka diputarka.

Pekara nya semina dikena raban penyakal nyadika isu ba pengawa politik sida tang enda nemu bakani chara mutarka isu nya, tandu iya.

“Semina perintah Barisan Nasional (BN) aja ulih mutarka penusah rayat,” ku iya.

Iya bejaku m unyi nya ba pengerami Nyuaka Chek Pampas Tanah ke diatur Opis Tanah enggau Survei (JTS) Bagi Menua Sri Aman enggau kerejasama Komiti Pemansang enggau Pengelikun Genturung Pendiau (JKKK) Rumah Empading, Nanga Bunu, Skrang, di rumah panjai nya.

Pengerami nya dipenyadika Kaban Parlimen (MP) Lubok Antu William Nyalau anak Badak.

Ba pengerami nya mega Dr Rayong udah ngerah ungkup Projek Mit Menua Pesisir (MRP) sepenyampau RM7,000 ngagai JKKK Rumah Empading, RM3,000 ngagai Biro Raban Indu rumah panjai nya.

Sama bisi datai ba pengerami nya Pemesai JASA Parlimen Lubok Antu, Geoffery Baja, pengari Penguasa JTS Sri Aman, Sulaiman Budin enggau pengari Opis Kereja Raya Sri Aman, Noor Ismail Razali.