Pemayuh veteran ATM ke nadai ngerejister ba JHEV nanggul atur bantu, ku Zulkiflee

Posted on February 21, 2012, Tuesday

PETALING JAYA: Urung 280,000 iku veteran Raban Soldadu Malaysia (ATM) empai ngerejister diri ba Opis Pekara Veteran Soldadu (JHEV), lalu tu ngenusahka pengawa opis nya ke deka nyuaka bantu perintah un­gkup sida.

Kepala Pengarah JHEV Mejar Jeneral Datuk Zulki­flee Mazlan madah, naka ke diatu semina 160,000 veteran soldadu udah ngerejister.

“Kitai napi penanggul ngagihka bantu ke bisi disediakka perintah sereta nentuka veteran soldadu ke amat tusah ke patut dibantu. Enti sida iya ngerejister diri ba JHEV, engka pengawa tu deka muntang dipejalai.

“Entara bengkah bantu ke bisi disediakka iya nya bantu perubat, bantu ba pengawa pengelantang pen­diau, bantu ba pekara pelajar raban anak alai RM500 diungkupka ngagai sekula primari, RM700 ngagai sekula secondari, RM1,000 duit bantu ba palan pelajar tinggi renggat Diploma sereta RM1,500 renggat degree,” ku iya kemari.

Dulu agi ari nya, iya ny­uaka Pingat Jasa Malaysia (PJM) ngagai 13 iku ra­ban Gerempung Angkatan Tentera India Malaysia (PERIM) ke dulu suba.

Entara orang ke neri­ma iya nya Leftenan (B) P.Nathan,63, ke udah meri servis dalam Soldadu Tasik Malaysia pengelama 24 taun enggau Sarjan (B) A.Kumari,53, ke udah gawa pengelama 23 taun dalam Soldadu Darat Malaysia.

Kumari, ke kala menang ba pekit nimbak ngarika Soldadu Darat lalu gawa ba opis Logistik soldadu madah, enda mayuh orang indu ngembuan peneka gawa nyadi soldadu jeman iya lalu iya mujur ngeringka ati diri ketegal nerima sukung ari sida sebilik. — Bernama

<< Previous Entry - Next Entry >>