Home - Utusan Borneo - Berita Iban - Johari ngarapka perintah berundingka peminta palan pengentap ex-soldadu
Johari ngarapka perintah berundingka peminta palan pengentap ex-soldadu
Posted on February 22, 2012, Wednesday
KUCHING: Komiti Pro tem Serakup Veteran Sarawak Rangers (SRVA) minta perintah ngungkupka kandang endur ti ulih nyadi palan pengentap Ex-soldadu nengeri tu.
Sekretari Besai Komiti Pro tem SRVA Kapten (B) Mohd Johari Ibrahim madah, perambu minta ungkup nya berindik ari pemayuh Ex-soldadu dibungkur dalam kategori bepenatai pemisi ti baruh, enda tebelika rumah sereta bisi mega ngentak rumah ba palan pengentap ke enda dikemendar.
“Perintah endang amat bisi nyendiaka skim pengawa berumah tang kami enda ulih mayar ninting bulan.
“Utai ti dikedeka kami iya nya sebidang tanah ba sesebengkah endur di nengeri tu nyadi palan pengentap ungkup Ex-soldadu,” ku iya ba aum pengarang berita di opis Pekara Veteran Soldadu (JHEV) ba Jalai Satok, ditu, kemari.
Nitihku Johari ke mega kaban JHEV, pemerat pengidup Ex-soldadu nengeri tu ulih dikelempung sereta berasai dipebasa laban ti ngembuan rumah diri, kelimpah ari asil betanam betupi ba tanah ti disediaka perintah nya ila.
Iya melabaka urung 9,000 ex-soldadu ari penyampau semua ke diatu iya nya 15,000, enda pinchin.
Ari penyampau nya ku iya, semina 6,000 ex-soldadu ti udah ngerejister diri enggau JHEV.
“Penyampau ke enda ngerejister enggau JHEV nya dipelabaka raban ke baruh penatai pemisi, nya kebuah kami minta perintah nengeri nyendiaka tanah, lalu ari nya ulih nyaga pengelantang orang ti kala nyadi soldadu.
“Kami ngarapka perintah ulih berundingka perambu peminta nya laban sebedau tu kami diau diri, lalu enti sema bisi penanggul jemah ila, anang nyalahka kami,” ku iya.
Berebak enggau tu, Johari mega minta perintah besai mansik baru penerima bayar RM3,000 ngagai raban penyaga pengelikun menua.
Ku iya, pekara nya ngujungka mayuh ex-soldadu enda lantang ati, lebih agi Sarawak Rangers ke enda ulih nerima bayar nya.
“Mayuh orang ti enda tentu ulih meretika pekara orang ti patut nerima bayar nya, lalu kami mega kala nulis surat ngagai Menteri Besai pun bulan nyin kemari minta iya nerangka pekara nya enggau silik,” ku iya.
