Home - Utusan Borneo - Berita Iban - SRVA ukai semina ungkup renjer aja
SRVA ukai semina ungkup renjer aja
Posted on February 22, 2012, Wednesday
AGI IDUP AGI NULUNG: Johari nunjukka logo SRVA
Serakup tu ditumbuh ngambika pengelantang ruang bilik semua ex-soldadu dikemerat
KUCHING: Serakup Veteran Sarawak Rangers (SRVA) ukai semina diungkup ngagai raban renjer aja, tang tau dipasuk semua soldadu ba menua tu.
Sekretari Besai Pro tem SRVA Kapten (B) Mohd Johari Ibrahim madah, nya alai penemu ti ngumbai gerempung nya semina ungkup raban renjer aja patut diperesi, laban tuju serakup tu ditumbuh ngambika pengelantang ruang bilik semua ex-soldadu dikemerat.
“Taja pen nama serakup tu ‘Sarawak Rangers’, tang nya diungkup ngagai semua Ex-Iban Trekers, Renjer Sarawak, Renjer Malaysia lalu kami bisi perambu deka nyerangkung sekali Ex-soldadu ari unit bukai baka Raban Soldadu Malaysia (ATM) iya nya Raban Soldadu Langit Malaysia (ATUDM) enggau Soldadu Tasik Malaysia (TLDM),” ku iya ba aum pengarang berita ba Indu Opis Pekara Veteran (JHEV), Jalai Satok, ditu, kemari.
Johari madah, presiden komiti protem, Lt Kol (B) Robert Rizal enggau iya empu pen ukai ari Renjer Sarawak, tang bekau Soldadu Malaysia urung taun 1964-1969, udah nya lalu diketuka kena 15 September 1953.
Nitihku iya, nama Renjer Sarawak dipilih kena meri basa ngagai orang ti numbuhka SRVA.
Setipak enggau rambai jaku Agi Idup Agi Nulung, SRVA deka bebendar mantu semua raban enda ngira bakani chara, ngaga kapasiti sereta ngenegapka belanja.
Taja pen bisi serakup bukai nyaga pengintu pengelantang Ex-soldadu baka Serakup Ex-Soldadu Malaysia (PBTM), JHEV, ku iya, SRVA lebih ngemeratka pemanah enggau servis ngagai veteran sereta ruang bilik sida.
Serakup mega ngelaluka serakup veteren enggau raban pengelikun ke bukai nyerakup sida, dikena ngenegapka pengari enggau sida ti patut, ku iya.
Ku iya, nyadi kaban serakup endang dibuka ngagai Ex-soldadu enggau sida sebilik sereta ngagai orang ti bisi ati, tau betelefon ngagai iya nengah lumur 012-8909568 tauka Mejar (B) Wara 016-8974147 tauka datai terus ngagai opis JHEV.
“Aku minta semua Ex-soldadu ngerejister diri nyadi kaban ngambika kitai ulih bekunsi penguntung, kelimpah ari ti ngenegapka Ex-soldadu sereta ngerapitka kaul,” ku iya.
