PUTATAN: “Au tokou muhang osiliu porinta ‘osiou’ om aiso ginawo monguyas lamin tulun katapi aiso tiyonon posodiaon, otopot nopo tayam nga haro tiyonon lungungon onu po wagu tulun,” irad diti noh pinoboros di Kumoduwo Boyoon Montiri, Datuk Seri Panglima Yahya Hussin kokomoi ahal pongiyanan Kampung Linsuk ih mangan huyaso montok tujuan kotundaan.
Reaksi Yahya ih nogi Puru Lamin Koundangan Pogun (Adun) Petagas dino au kosokodung gaab Konsol Watas Penampang (MDPg) montok popolombus do ponguyasan koiyonon dino nga otopot nopo pongiyanan kawawagu au poh nokosodia montok mogigiyon do hilo.
Ontok romuto konihab, kipomusarhan nogi isio do tantu do au kangaam kopio sokiro ko monguyas lamin rayat miampai au manahak kosiwatan om koposodiaan lungungon diolo.
“Konsol watas baino diti haro duwo baino, om tokou ih haro kuasa baino. Boogian konsol watas Putatan mokianu diolo popotingkod ahal dino do namot gisom asalasai ahal diti.
“Au tokou mimang osiliu porinta di osiou om au aiso ginawo miampai monguyas lamin tulun katapi au poposodia do tiyonon sundung pia koiyonon dino nopo nga ‘setinggan,” ka dau ih pinopointarang nogi do ahal dino nogi mositi posuulon doid Konsol Watas Putatan (MDPTN) pogului koimbulai nunuun laang di au koposontob ginawo.
Yahya ih nogi Montiri Pomutanaman om Pomorunan Takanon minoboros ahal dino kumaa do magaganu abar ontok suminimbar ahal laang MDPG om boogian popoburu montok monguyas do pongiyanan Kampung Linsuk montok tujuan kotundaan idsuang timpu tosomok diti.
Perkampungan ih popopiyon do kiikira 1,000 tulun mogigiyon dino baino au poh nasalasai soira MDPG om boogian popoburu kigaab montok manalasai ahal dino om mokianu kosianan tu Kampung Linsuk pinosurat sabaagi iso kokompungan kinoiyonon.
Namot dino, Upisor Watas Putatan, Ag Abd Ghani Pg Yusoff minoboros do kokuasaan dino mokianu kumaa MDPG montok papatahak do pijonjian pogulu-laid kumaa dagai montok MDPG menyerahkan perjanjian antara pihak pemaju itu untuk diseleraskan ke MDPTN.
“Baino diti, MDPTN mokianu MDPG popotingkod montok do namot pogului maganu lang montok panalasaian.
“Monok dino, nokopokianu tokou no do MDPG montok papatahak do pijonjian pogulu-laid kumaa dagai montok tujuan koponorinaan,” ka dau.
Pogului dino, Yahya pinotimpuun do Ababayan Kapanaakan Sakadai Rayat 1Malaysia (BR1M) montok Parlimen Putatan, id nonggo nokopokito do lobi 1,000 tulun ponorimo sakadai dino id Dewan Serbaguna hiti koniab.
Nokotindapou nogi id ramai dino nga ih Puru Parlimen Putatan, Datuk Marcus Majigoh, om Panakadai Montiri Koporintaan Kinoiyonon om Pomulaminan, Datuk Edward Yong Oui Fah ih nogi Adun Tanjung Aru
Kokomoi BR1M, pinointaran di Yahya do sakadai kiginumu RM500 dino kopokito do komitmen koporintaan Barisan Nasional (BN) monulung rayat montok mongingkudi do kawagatan diolo.
“Sakadai BR1M aiso wongi pulitik, katapi ino nopo nga pambayaran totopot koporintaan BN ih ‘prihatin’ kumaa rayat. Mantad dino, sakadai dino mositi gunoon miampai tososonong montok papagaan kawagatan paganakan,” ka dau.