Tolu ‘penjenayah’ nagakom pulis

0

KOTA KINABALU:  Pulis nakaanu minamagakom do iso tinimungan kusai ih kikotumbayaan nakaamung id piipiro kaparagatan koimaan taraat (jenayah) kaamung mongorumpak, mmagamu om manakau idsuang linominon id posorili Kakadaian Tagayo Kota Kinabalu.

Id pinonugkuan di tadau Koduwo kiikira jam 2.45 minsusuab id Jalan Kolam hiti, tolu kusai kiumur pialatan 22 gisom 35 toun nagakom ontok luminisok idsuang iso korita ih sinakayai diolo.

Kumoduwo Luguan Pulis Bandaraya, Superintendan M Chandra minoboros nokokito nogi pulis do piipiro koumatan kikotumbayaan gunoon montok papanau do koimaan taraat (jenayah), pialatan dino iso pais om dangol, kayu besbol, om piipiro beg longon tondu ih kisuang ‘dokumen’ kiguno.

Suai mantad dino, nahau nogi mogisusuai numbur koporijistaran korita om piipiro kunsi om bakaang ngawi montok papanau do koimaan taraat.

“Ontok kinantakan, duwo puru pulis mantad Balai Pulis Luyang pinapanau pimpanaan id Jalan Kolam om nokokito do iso korita kawo Mazda id kooyuon mosi-rosi, om pinapanau do pomorisaan.

“ASil pinomorisaan, noilaan do pulis do tolu kusai dino luminisok daa id tirung bangku idsuang korita montk mongilag okito, natadon do puru pulis dino nokomoi nokoilo haro ahal di au osonong om minonuhu di kotolu-tolu kusai dino luminabus montok  pomorisaan.

“Kalapas diri, kotolu-tolu suspek luminabus om pinomorisaan aiso kakamot di kooris idsuang tinan diolo (suspek), om asil pinomorisaan kumaa korita suspek pulis nokokito pipiro koumatan kikotumbayaan gunoon montok kaparagatan jinayah,” ka dau id pitimbungakan abar id Longkod Upis Pulis Watas (IPD) Kota Kinabalu, Karamunsing hiti konihab.

Minoboros ih Chandra do ponoriukan nokopogulu noilaan kotolu-tolu diolo diti nokoompit idsuang walu kes kapaamung do momorumpak, mamagamu om manakau  idsuang linominon om kiharo dadah.

“Ponoriukan potilombus nokoilo kotolu-tolu diolo ih sompori-pori kiumur 22, 34 om 35 toun diti aparagat papanau do kaparagatan ‘jenayah’ mantad podi toun 2007 gisom 2011. Toinsanan diolo nopo nga bagas ‘banduan’.

“Miampai kinagakaman kotolu-tolu suspek dino nokomoi, nakaau pulis mananalasai do walu kes kapaamung do mongorumpak, mamagamu om manakau idsuang linominon,” ka dau.

Minoboros isio do asil poniisan waig sobu noilaan kotolu-tolu suspek ‘positif’ dadah kawo syabu om kakaal papanau do ponoriukan.

“Ponoriukan nogi noilaan korita ih ginuno di suspek ontok tinahan nopo nga korita pinanakau om toinsanan diolo soriukon tumanud Seksyen 394 Kanun Koinggoritan sabap minomorumpak harata sanganu munggui om Seksyen 457 Kanun Koinggoritan sabap kasalaan minamabak lamin.

“Toinsanan suspek nogi soriukon tumanud Seksyen 379a Kanun Koinggoritan iso’i sabap kasalaan manakau korita om Seksyen 380 Kanun Koinggoritan sabap minanakau,” ka dau.

Namot dino, pinapatahak nogi ih Chandra do sijil pamagatangan kumaa duwo puru ih pinapanau pamagakaman dino sabap koboronian diolo, iyolo nopo nga ih Koperal Irwan Kirana dan Lans Koperal Sokongan Bobby Mahidin.

Namot dino, id kes misusuai, minoboros isio do nakapanahan pulis duwo kusai id iso lamin id tingkat dua id Api-Api Centre hiti di tadau Minggu nakatalib sabap nakaamung kes mamabak lamin.

“Tumanud do ruputan di pinoburu poporuput, id kinantakan Disember toun nakatalib, minoboros do lamin dau binabak suminuang om natagakan iso televisyen LCD 40 inci natadon do pinoporuput norugi do kiginumu RM3,000.

“Asil ponoriukan, pulis nakaanu minogium om minanahan duwo kusai kiumur 20 om 35 toun ih pakaraja sabaagi tukang amas om songulun kagu pakaraja iso hotel,” ka dau.

Minoboros isio do miampa pinanahanan duwo kusai dino, nokito kawagu pulis ohtelevisyen LCD 40 inci om pomorisaan potilombus pulis nokokito iso kagu televisyen LCD 29 inci, iso komputer riba, duwo kamera digital, iso kamera rakaman om duwo jam longon. Gatang rampasan kiginumu RM15,000.

“Goduwo-duwo suspek baino tinaan namot montok ponoriukan potilombus om kes diti soriukon tumanud Seksyen 457 Kanun Koinggoritan sabap minamabak suminuang linominon,” ka dau.

Chandra (wanan) popokito do koumatan om barangan ih nahau mantad tolu suspek id Jalan Kolam di kawawgu.