Anang ngelempai ba pengajar aja, apai indai ulih ngembing anak ngambika mujur ba pelajar
SIBU: Penanggul enda nemu macha, nadai pengelandik, enda kala besekula ukai nekul bala apai indai ngembing anak sida ngulihka pemujur ba sekula.
Kaban Kunsil Nengeri (ADUN) Tamin Joseph Mauh Ikeh madahka mayuh jalai bukai alai apai indai begigaka chara dikena nyelingkutka penanggul nya.
“Kitai bela nemu tebal agi bala apai indai ba rumah panjai mayuh enda kala besekula, enda nemu macha. Tang tu ukai nyadika batang pekara alai kitai semina bepanggai ba sekula tauka pengajar ngajar anak kitai aja,” pia ku padah iya.
Iya mantaika jaku nya maya bejadika Pengerami Makai Lemai beserimbai enggau Aum Besai Sarakup Indu Dayak (SIDS) Pampang Sibu seraya ngemataka pengawa angkat sumpah komiti baru SIDS 2012 ba sebengkah hotel tebilang ditu, kilah ensana.
Nandu jaku iya baru, ku Mauh, taja enda ulih mantu anak belajar tang apai indai ti ransing ulih ngaga mayuh chara bukai baka nyediaka siti sukut dalam rumah alai bala anak belajar.
Ku iya, sukut tu digaga engkeman ngambika nembiak ulih belajar enggau ati lantang sereta enda mudah leju.
“Taja kitai nyangka enda nemu ulu ili pengawa pelajar tang kitai mesti landik meransang anak belajar di rumah.
“Duku kitai sama magang, enda ngira bansa baikka China tauka bansa ke dulu agi mujur ari kitai bansa. Tang enti kitai bagas ngansah dia duku tau tajam sebaka enggau enggi orang,” ku iya sambil madah rayat rumah panjai anang tebelengga ngemataka singkang orang tang mesti sikar nunda pemujur orang bukai.
Bekenangka pemujur orang indu kemaya hari, ku iya, diatu raban indu enda ulih dipeda baka dulu kelia laban udah mayuh tetundaka pemujur orang lelaki lalu pungka bisi nya ngelui ari sida ke laki baikka ba pelajar tauka tikas penuduk ba pengawa.
“Taja pan baka nya, anang guai dulu puas ati tang majak ke singkang kita nyerumba sida ke laki ngulihka pemujur.
“Tunda sida ke udah mujur ngambika kita raban indu bela nyulut besaup ngemansangka diri napi ubah maya rama,” pia ku iya madahka baru.
Tang ba pengawa besehari-sari, ku Mauh, indu enggau lelaki tauka apai indai ngembuan tanggung pengawa ke sebaka ba ruang bilik diri empu.
Iya madah, diatu laki bini enda ulih besuie ngagai pangan diri lebih agi ba pekara mela bala anak laban tu segi tanggung pengawa ti digaga enggau chara besaup.
Apai indai ti nadai bepananggul ba ruang bilik nentuka tuju kuing pengidup anak sida tauka rebak baru jemah ila.
Ba pengerami tu mega Mauh ngerahka geran projek menua pesisir (MRP) RM5,000 ngagai SIDS Sibu ungkup progrem ke diatur sarakup tu sepemanjai taun.
Pengerami makai lemai tu mega disempulang pengawa angkat sumpah komiti baru SIDS Sibu 2012, nyuaka kelai ngagai bala komiti ke udah lama meri servis ngagai sarakup,nyuaka peransang (insentif) ngagai bala anak komiti ti mujur dalam peresa perintah, beperindang mantaika ajat enggau tanda kelimpah tikit benasit.
Bela bisi datai rambau tu iya nya, chairman SIDS Sibu Ir Alice Jawan, pengari SDNU Sibu Jawi Anum, Direkter Pusat Kepimpinan Wanita Universiti Kebangsaan Malaysia (UKM), Professor Madya Madeline Berma, Pemancha Stanley Geramong enggau bala ke bukai.