SIBU: Raban polis deka ngaga palan alai ngatur pengawa nginau ba Empawah, Rejang Park enggau Permai ngambika tiga buah palan pengentap pendiau tu likun.
Kepala Polis Pelilih Sibu, ACP Shafie Ismail bejaku munyi nya maya dikerandau pengarang berita ba progrem betemu enggau mensia mayuh di Rejang Park, empai lama tu tadi.
“Naka ke diatu apin bisi raban polis ngaga pengawa matau ba tiga buah palan tu ba kandang 24 jam,” pia ku iya sambil madah sebuah langkau alai polis ngaga pengawa matau udah bisi ba Jalai Salim.
Ku iya, ba tiga buah palan tu raban polis ila deka ngaga pengawa matau lebih agi ngurangka penyalah rama ba Rejang Park.
Berindik enggau tu mega, Kepala Opis Polis Miri ACP Jamaludin Ibrahim ti mega sapit sekretari Langgur Pemesai Pemujur Menua (NKRA) Opis Menteri Dalam Nengeri madah, raban polis deka ngemanahka agi pengawa nginau ba menua tu.
“Raban polis ngaga pengawa nginau enggau chara nyelai agi, ambika chunto enda nebah siren ngambika muntang agi nangkap orang ke salah,” pia ku iya maya nyaut sebana ari mensia mayuh ke nguan genturung pengentap pendiau Rejang Park.
Beduduk ari pekara nya, Jamaludin ngelalau mensia mayuh ngeriput ngagai polis nyema bisi tepedaka orang ti nyelai lalu tau ngereja penyalah.
Ba pengawa sehari nya mega, mensia mayuh nyengkaum tuai raban bansa mantaika sebana sida ngagai penyalah rama ke suah nyadi ba Rejang Park.