Pun buah ke ditanam enda jauh ari jalai besai ditebang

0

BINTULU: Bisi 60 iku raban pengereja pengawa Bintulu Development Authority (BDA) Unit Ngemanahka Rampa Menua enggau ngulu pengawa nebang sereta meresi pun kayu sepemanjai 1 kilometer ba Jalai Tun Ahmad Zaidi besepiak enggau Sanctuary Villa ditu kemari.

Tukang pengerembai berita nya madahka pengawa ngerah atur nya udah dikereja ngagai genap orang ke beempu rumah ngelingi nya ba pengawa sida ti nadai pemendar nanam pun buah, netak lalu nunu kayu bepun ari bulan Disember taun nyin tadi.

Ku iya, bisi 17 iti surat tangkan udah diberi ngagai 12 iku orang ke beempu rumah maya 12 enggau 13 March tu tadi ti ngasuh sida mindahka pun buah nya tang nadai dipedulika sida.

Pengawa ke betanamka pun buah sepemanjai jalai alun nya tegal udah ngelanggar atur ba baruh The Local Authorities (Cleanliness) By-laws, 1999 enggau Protection of Public Health Ordinance 1999.

BDA berengkah ari taun 2000 nagang pengawa orang beempu rumah nanam pun buah ba nisi rumah ti besemak enggau jalai alun.

“Nya alai, seharitu (kemari) kami nebang lalu meresi palan ke kena nya sepengalama dua hari,” ku tandu iya.

Pengawa nya mega bisi digulu raban polis ngambika bejalai enggau lanchar.

Ku iya, ba atur ke sebaka, BDA mega deka ngelawa endur bukai udah nya ila baka ba Lucky Tower. Nya alai, iya ngelalau orang ke beempu rumah ti bisi nanam pun buah ba genturung pendiau mensia mayuh dipinta mindahka pun buah nya.

Iya madahka perambu ari BDA nya siti ari atur meri awak ngagai sida ngemanahka genturung rumah nengah nanam pun kayu ke dikemendarka opis kunsil tang ukai nanam pun buah ke ungkup diri laban nya ngelanggar atur Opis Kunsil Perintah Menua.