KUCHING: Seiku raban Parti Pesaka Bumiputera Bersatu (PBB) ari Kampung Kiding Padawan, Roger Tiyod dekaka chalun baru ngarika sitak Parlimen Mambong ba Pengawa Bepilih Besai ti Ke-13 (PRU13) tu ila.
Iya ngelabuhka penemu munyi nya madahka raban PBB di Kiding, Kampung Perang Asum, Sepit enggau Kekas dekaka ubah ba chalun, ngambika ngena penemu baru ngemansangka sitak nya .
Roger madahka mensia mayuh dia enda bebulaka Dawos udah gawa ngemansangka sitak nya, tang chalun ke chakah sereta biak agi lebih beguna awakka meri sereta mai pemansang ngagai sitak nya, lebih agi ba empat buah genturung pendiau dia .
“Ukai kami enggai ngundi Barisan Nasional (BN), tang udah chukup maya chalun ke biak sereta orang baru ngarika sitak nya (Mambong) ba pengawa bepilih besai tu ila ,” ku Roger madah ngagai The Borneo Post ensana.
Iya nambah, Dawos ke mega Sapit Menteri Dagang Temuai, udah nyadi MP tiga renggat, lalu udah datai maya chalun baru sereta biak agi diberi peluang .
Ku iya, ba tikas tuai pampang mit, sekeda nya raban pengajar enggau pengereja pengawa perintah enggai ngaga sebarang penerang .
Sekretari pampang PBB Bengoh Jeguk Ngamo, lebuh ke dikerandau madahka nyilih chalun setegal ti deka nyilih nya pekara ke enda masuk akal .
Iya madahka Dawos ‘chalun ulih menang’ , lalu enda nemu sekalika chalun baru ila deka mai pemenang tauka enda.
Kelimpah ari nya mega , chalun baru nyema menang pan bedau meh tentu deka mangku pengawa menteri sebaka enggi Dawos diatu .
“Ba aku Dawos agi chakah bejalaika pengawa nyadi MP ungkup serenggat agi (lima taun ), keba nganti iya nya enda patut,” ku Jeguk ti setuju enggau penemu mandal chairman Sora Rusah, ti mega nyukung Dawos dichalunka baru.
Berebak enggau nya , Roger madahka iya enggau redak Kampung Kiding engau Kekas enda bula nyida setegal jalai ke diperamabu ari Kampung Kambug, nyambung dua bengkah genturung pendiau nya bedau udah berengkah.
Nitihku iya , pengawa nasih tanah udah dipejalaika bulan April taun nyin kemari , sebedau pengawa bepilih nengeri nyentukka sehari tu bedau dipejalaika .
“Jalai ke manjai 3.8 kilometer enti digaga deka meri pengelantang seraya nguntungka kami ari sukut ekonomi,” ku Roger.