KOTA KINABALU: Watas Kuala Penyu ih nointutunan miampai taakanon koubasanan ‘ambuyat’ toiko sagu nopili sabaagi monompuan walai montok ababayan kopoimaganan Tadau Kaamatan ontok 1 Mei toun diti, ka di Kumoduwo Boyoon Montiri Tan Sri Joseph Pairin Kitingan.
Ontok pinoboros do ahal dino, isio ih nogi Ponorikohon Komiti Induk Karamaian Tadau Kaamatan nayatan pogun minoboros ababayan kopoimaganan karamaian nulu’an “Oupus Nokomoi Koubasanan Poposoribau Tulun Obingupus” dino pohoroon id Dewan Shahbandar Makang om potimpuuon dati di Boyoon Montiri Datuk Seri Musa Aman.
“Nokosigampot noh Kuala Penyu do 80 paratus koposodiaan papalantoi do pangaramitan karamaian dino. Om koposodiaan manaandak Kaamatan id boogian watas nokotimpuun noh, om watas Putatan nopo nga watas koiso manganjur do Tadau Kaamatan do ontok 5 Mei tabantalan,” ka disio kumaa do magaganu abar kalapas minomorikohon do miting komiti dino hiti di konihab.
Minoboros ih Pairin do tulu karamaian toun diti kangaam kopio miampai tonggungan karamaian dino ih anggapon sabaagi tiyonon montok popogirot pisompuruan tulun mogisusuai tinaru doulu noh id Sabah ih anggapon sabaagi ‘model gagasan 1Malaysia.
Isio ih nogi Porosiden Koisaan Koubasanan Kadazandusun Sabah (KDCA) minoboros kolimpupuson kapanandakan Tadau Kaamatan boogian pogun pohoroon id Hongkod Koisaan KDCA Penampang do ontok 30 om 31 Mei miampai mogisusuai ababayan kaampai pokitanan koubasanan tinaru Kadazandusun.
Namot dino, pokionuon nogi di Pairin oh toinsanan puru komiti id boogian watas id pointongkop pogun tuh papatatap do tadau kapanandakan Tadau Kaamatan sompori-pori.
Tadau koowion montok watas ngawi papaharo do kapanandakan karamaian nga ontok 22 Mei 2012.
Iti mooi do kaanu papaatod wakil doid pialaan panantaban Sugandoi om Unduk Ngadau Kaamatan 2012.
Pialatan kaparagatan mangan pohoro kopinamot miampai pangaramitan karamaian diti kaampai noh pialaan Sugandoi Kaamatan, pokitanan asil ngawi pomutanaman om kakamot kinuama tunturu sipoot rayat om pokitanan koubasanan mohisusuai kointutunan id pogun diti.
Sugandoi Kaamatan kaharo do ontok 25 Mei om konsert KDCA nopo nga kaharo do ontok 26 Mei id Hongkod Koisaan KDCA Penampang.
Om ‘Gala Nite’ nopo nga kaharo do ontok 29 Mei id tampat ih iso’i.
Tiket ngawi kigatang RM1,000 gisom RM5,000 baino dagangon kumaa tulun ginumuan.
Ababayan kolimundukon karamaian Tadau Kaamatan toun diti potimpuunon dati di Gounal Pogun Tun Juhar Mahiruddin do ontok 31 Mei.
Ontok tadau ponogi dino, pialaan panantaban Unduk Ngadau Kaamatan ih ampayaton di nakamanang ngawi boogian watas id pointongkop pogun kaharo nogi.