Bejejaga tunggul kayu ba dalam sungai

0

MINTA LIKUN: Aaron (duduk, tiga kanan) enggau bala bukai ngulu pengawa miring Nasih Ai Lubuk Paku, Hari Minggu tu tadi.

KANOWIT: Mensia mayuh ke agi mengkang betengahka sungai ditangkan ngambika semampai nyaga pengelikun diri.

Kaban Parlimen Kanowit, Datuk Aaron Ago Dagang madah, kelimpah ari peneras ai, penusah ke nuntung bala ti betengahka sungai mega tebal agi bepun ari ngelantak tunggul kayu ti enda dipeda dalam ai.

“Nya kebuah mensia mayuh lebih agi rayat ba Ngemah ti betengahka sungai mansa Lubuk Paku ditu enda tau ilap nyaga pengelikun sida.

“Kitai enda nemu dini endur tunggul dalam ai,” ku iya madah maya pengawa Nasih Ai Lubuk Paku, ditu kena Hari Minggu tadi.

Bela bisi ngemata pengawa tu iya nya, Panglima Sembilan Briged, Brigadier Jeneral Datuk Stephen Mundaw, Pemancha Spencer Kudang, Penghulu Juni Massam enggau Penghulu Ambrose Digat.

Nandu jaku iya, ku Aaron, pun kayu ke rebah tauka ditaban tanah tusur tau bendar nyadi tunggul lalu ngeruga pengelikun mensia mayuh maya nengah sungai nya.

“Kitai enda nemu ni maya pun kayu dibai tanah tusur, kayu tu tau nyadi tunggul dalam ai lalu enti enda dibuai dia perau tau ngelantak iya.

“Beduduk ari nya, kitai anang enda bejimat sereta ngerunding pengelikun diri enggau bala bukai,” ku iya.

Berebak enggau tu mega, iya ngelalau mensia mayuh ngambika bekerejasama enggau ijinsi perintah baka RELA enggau polis ba pengawa matau pengelikun sungai.

Enggau chara tu, ku iya, nyema bisi meda pekara baka tanah tusur mensia mayuh tau minta saup ijinsi tu.

Pengawa nasih ai ke digaga sehari nya dikena ngampun ngambika bala ti nengah Lubuk Paku tau diseliah ari penusah enda disadang baka karam.

Kena 6 Disember taun siti nyin kemari, tiga iku diri sebilik bebadi ketegal perau ke ditepan enggau empat iku bala bukai karam maya mansa Lubuk Paku tegal ngelantak tunggul kayu.

Apin penusah nya, sida benung mulai ke diri ngagai Nanga Ngungun sepengudah tembu ngembuah ba Nanga Nirok urung pukul 4.30 lemai.

Bangkai niang Celia Benang, 28, ditemu urung beberapa jam sepengudah penusah nya nyadi lalu niang madi lelaki iya Aaron Benang, 17, enggau anak indu iya Satah Joseph,10, ditemu dua hari udah nya.