PUAS ATI: Raban nembiak nerima puji ari Jabu pengudah nerima setipikit sida.
KUCHING: Enggau penumbuh tiga buah Kolej Komuniti (KK) ke baru deka dibuka, ngujungka penyampau lapan buah semua di Sarawak.
Sapit Kepala Menteri, Datuk Patinggi Tan Sri (Dr) Alfred Jabu madah tiga buah KK ke deka ditumbuh nya, diungkup ke Sibu, Sarikei lalu sebuah agi benung dipansik endur ke manah alai KK.
“Pengabis laun ngaga tiga buah KK tu dalam Langgur Malaysia ke-10 tauka RMK-10 sebedau 2014.
“Enti sema enda chukup KK, kitai tau minta tambah agi laban kitai bisi kaul ke terit enggau perintah besai.
“Nya alai, KK Sarawak sigi diungkup kena ngelatih nembiak nyendiaka sida iya kena mungkal SCORE ke sigi begunaka pengelandik,” ku iya madah lebuh dikerandau sepengudah bejadika atur pengawa ‘Majlis Konvokesyen Kolej Komuniti Sarawak ti ke-8’ di Hotel Four Points by Sheraton ditu, kemari.
Sebedau nya ba jaku iya ba atur pengawa nya, Jabu ti mega Menteri Ngemoden Pengawa Betanam Betupi enggau Menteri Pemansang Menua Pesisir madah, kemaya hari tu apai indai seruran enda ngemeratka pelajar kelebih agi ke bisi bekaul enggau teknikal sereta vokasyenal laban ngumbai penampak lebih agi nengah pemujur akademik.
“Penemu munyi tu enda entu betul laban pelajar teknikal enggau vokasyenal sama bisi pemerat, kelebih agi nyadi agenda dalam pemansang menua nuju Wawasan 2020 ke deka ngaga menua nyadi menua industri besai ukai semina di Asia tang serata dunya,” ku iya.
Berindik ari nya, ku Jabu, entara atur ke digaga Perintah Menua, iya nya meri kelala ‘Tabung Ekonomi Gagasan Anak Bumiputera Sarawak (TEGAS)’ ti dipejadika kena 28 Februari tu tadi.
“TEGAS dipejadika betuju ngangkatka pelajar teknikal enggau vokasyenal ke nembiak Bumiputera Sarawak.
“Tu entara komitmen perintah menua dalam ngangkatka sosio-ekonomi rayat Sarawak nyengkaum berati deka ngaga Sarawak nyadi menua bepengeraja di Malaysia manggai taun 2030,” ku iya.
Kelimpah ari nya mega, iya minta KK Wilayah Sarawak patut terus negapka pelajar teknikal enggau vokasyenal nengah aktiviti pemansang pengawa, ngangkatka pengelandik, latih industri ngagai nembiak sereta nyendiaka kos pengelandik ke dipinta industri.
Sebedau nya, Ketuai Direktor Opis Pelajar Kolej Komuniti Opis Menteri Pelajar Tinggi, Amir Noor madah kelimpah ari Kolej Komuniti ke benung dikemansang, politeknik mega sama dikemerat.
Nambah politeknik ke udah bisi di menua tu (Kuching, enggau Mukah), sebuah agi politeknik benung digaga di Betong, iya nya Metropoliteknik ke dipelaba tembu dalam taun 2014.
“Enti tembu dalam 2014, nyangka rebak nembiak ke deka masuk ngagai Metropoliteknik tu deka diambi dalam bulan Jun tauka Julai,” ku iya.
Lebuh ditanya ngagai iya penyampau graduan KK ke diambi gawa ke udah nembuka pelajar sida iya, ari semua penyampau ke udah abis kus, 70 persin mujur teulihka pengawa, lalu laluh nya, mayuh nyadi orang dagang, ku iya.
Kelimpah ari program formal, KK mega bekerejasama enggau Perintah menua alai palan KK digaga nyadi palan latih (pelajar semanjai idup).
Taun nyin tadi, urung 219,000 udah dilatih ngena ungkup latih 1Malaysia.
“Taun tu dikangau sida iya SAY1Malaysia, Sarawak deka teulihka ungkup nya ke udah dikemendarka Menteri Besai (PM) RM200 juta,” ku iya.