Site Last Updated 5:02 pm, Wednesday

Pengereja pengawa rama aruh bisi pemendar tauka lisin, ku Fatimah

Posted on May 9, 2012, Wednesday

KUCHING: Opis Menteri Pengintu Pengelantang, Orang Indu enggau Pemansang Ruang Bilik (KWPKM) nengah Opis Pengintu Pengelantang Raban Bansa  (JKM) ngatur Program Begiga Penemu Langkar Undang-undang Pengereja Pengawa Rama sebedau dibai ngagai Parlimen bulan Oktober ti deka datai.

Menteri Pengintu Pengelantang, Orang Indu enggu Pemansang Ruang Bilik, Datuk Fatimah Abdullah madah, program nya diatur ba serata nengeri nyangkaum Sarawak enggau Sabah kena nentuka Akta Pekerja Sosial ulih ditumbuhka.

“Tuju program begiga penemu Langkar Undang-undang pengereja pengawa rama dikena ngiga input ari raban ditagit (Gerempung Ti Ukai Dikuasa Perintah (NGO) enggau opis ijinsi perintah ti bisi kaul enggau pengereja pengawa rama.

“Tu chara intensif sebedau ngaga sereta mai Langkar Undang-undang ngagai parlimen ngambika dikemendar kena numbuh Akta Pekerja Sosial ke mega dikemeran ba Sarawak,” ku iya.

Fatimah mansutka penemu iya ba aum pengarang berita Program Begiga Penemu Langkar Undang-undang Pengereja Pengawa Rama ti diatur ba sebengkah hotel ditu, pagi kemari.

Dulu ari nya iya bejadika Program Begiga Penemu Langkar Undang-undang Pengereja Pengawa Rama ti digulu raban NGO sereta ijinsi perintah ti bekaul enggau pengawa rama.

Lebuh nandu iya madah, pengereja pengawa rama sebengkah pengawa profesyenal ti patut ngembuan pemendar tauka lisin.

“Pengereja pengawa rama enda tau enda bisi lisin, baru tau dikumbai orang profesyenal baka sida luyar enggau ke bukai,” ku iya seraya madah pengudah Akta Pekerja Sosial ditumbuhka semua pengereja pengawa rama enda tau enda ngerejister diri.

Berebak enggau tu Fatimah madahka Majlis Pekerja Sosial deka ditumbuhka ketegal pengereja pengawa rama ukai semina mantu ari segi belanja tang mungkur tanggung pengawa ti besai.

Skop tanggung pengawa nyengkaum nyadi Pegawai Kerja Sosial, Pegawai Penerangan, pemeri licha sereta ‘Liasion Officer’.

Atur ti patut dititihka orang ke deka nyadi pengereja pengawa rama iya nya ngembuan Ijazah Sarjana dalam Sains Sosial kelimpah ari ngembuan penemu penyayau enggau pengasih; sedia napi pemar; besedia, deka enggau bebendar deka belajar; nyungkakka kapasiti diri enggau ke bukai.

Nitihka penerang ari JKM nengeri, ba Sarawak diatu bisi 656 iku pengereja pengawa rama perintah (semina ba JKM).

Bisi datai ba pengerami nya kemari Menteri Muda Pemansang Ruang Bilik enggau Pelajar Anak Mit, Rosey Yunus; Sapit Ketuai Direktor (Pengatur), Indu Opis JKMM Sharudin Shar Kassim; Direktor JKM Nengeri Sarawak Noriah Ahamd; Sekretari Mendam Opis Menteri Pengintu Pengelantang, Orang Indu enggau Pemansang Ruang Bilik Rodziah Morshidi.

Print Friendly

We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Comments are closed.