LIM SU KIEN
KUCHING: Komiti Milih Chalun (SC) Parti Tindakan Demokratik (DAP) udah ngaga pemutus milih Lim Su Kien, 39, ari Niah, Miri nyadi chalun Parlimen ba pengawa bepilih (PRU) 13 tu ila, ku Chairman DAP Nengeri Wong Ho Leng.
“Aku minta semua raban DAP ari barang bengkah endur tauka sitak meri kerejasama sida iya ngagai Lim ke udah dipilih bediri di PRU 13.
“Pengawa bepilih PRU 13 tu pengawa ke berat, lalu semina ulah ke beserakup ulih ngangkatka pemujur Pakatan rakyat (PR) di Miri,” ku iya madah ba aum media ba Aum Kunsil Nengeri DUN Renggat Kedua hari keempat ditu, kemari.
Ku Wong, pengawa bepilih sekali tu ukai pengawa ke muntang ba DAP tang iya ngarapka tiap iku rayat enggau raban parti sama begempung ngangkatka pemujur PR.
Dalam pengawa ngaga pemutus sapa ke patut bediri ba sitak Miri tu SC betuaika Wong empu lalu dibantu raban komiti bukai nyengkaum Sekretari Besai DAP Ching Chieng Jien, Kaban Kunsil Nengeri (ADUN) Kidurong Chiew Ching Sing, ADUN Pujut Fong Pau Tek, ADUN Sarikei David Woan Kie Wong, ADUN Meradong Ting Tze Fui enggau Mandal Chairman DAP Menua Chong Siaw Jiang.
Lebuh ditanya ngagai Wong enti sema pemutus DAP tu sepenemu enggau Pakatan Rakyat bukai, ku Wong: “Tu pemutus DAP lalu ukai PR. Tu pemutus DAP milih Lim Su Kien bediri ba sitak Miri ba PRU 13 tu ila,” ku iya.
Lim udah begulai enggau DAP ari taun 2008, lalu keterubah iya kala bediri ba pengawa bepilih iya nya ba taun 2008, alai iya betangkup enggau Kaban Parlimen Bintulu Datuk Seri Tiong King Sing.
Ba pengawa bepilih nya, Lim alah nengah majoriti enda mayuh.
“Taja pia, ba pemutus nya, taja alah, tang umbas iya, majoriti pen enda mayuh, enda baka ke disangka kami. Lebuh nya meh kami berunding DAP begunaka chalun indu,” ku iya.
Tang taja pia, ku Wong, raban ke enda puas ati ba pemutus SC tetap bisi.
“Kelebih agi chalun ba Miri. Kami pen enggai ngaga diri madahka nadai penyarut ba pemutus kami.
“Tang kami udah beratika komitmen chalun, penau parti, pengelandik sereta peneka chalun belajar…..Pekara bansa tu ke dipeda kami, nya alai Lim ke pemadu manah,” ku iya.
Nya alai ku iya, minta semua raban parti ke nyangka chalun ke dipelaba kena pilih, tauka orang bukai, tauka bisi orang ke enda lantang ati ba pemutus tu, aruh mega bekerejasama enggau Lim.
Ba pekara ke sama nya megaChong Chieng Jien madahka Direktor Operasi DAP PRU 13 sitak Miri tu ila, deka betuaika ADUN Piasau, Alan Ling.
Ba sitak bukai ke bedau dipadah sapa ke deka bediri lalu ba senentang sitak, ku iya, semina mimit aja penuduk ke patut diperatika enggau manah.
“Ba Stampin, ukai penuduk ke tau mai penyarut enggau PR. Enti bisi pen, nadai ngemayuh nya ke deka diperebutka DAP enggau PR. Kami ulih sama duduk berundingka pekara nya,” ku iya ngarapka sebedau 23 Mei tu ila deka madah bagi penuduk ke deka alai sida iya bediri dipelaba entara 12-13 penuduk.