Site Last Updated 2:38 am, Thursday

Pengerembai broadband tejanggal berindik ari penyelai rampa menua

Posted on May 23, 2012, Wednesday

KUCHING: Perintah meretika kebuah peranak menua pesisir enda ulih bungkur kerembai broadband bewayar ketegal penyelai rampa menua.

Menteri Perengkaguna Mensia Mayuh, Datuk Amar Awang Tengah Ali Hassan madah, kena mutarka penanggul tu, Perintah nengah saup pemekal servis telekomunikasyen ngena chara nadai wayar mai kerembai broadband ngagai menua pesisir.

Nengah inisatif ‘Kampung Tanpa Wayar’, sitak ke nadai wireless broadband deka ngena satelit, ku iya.

“Tiap endur ke bisi ‘hot spot’ nadai wayar nengah program tu, ulih nyendiaka kerembai wireless broadband datai ngagai 300 meter radius,” ku iya.

Iya madah baka tu lebuh ngulung jaku sereta nyaut Kaban Kunsil Nengeri (ADUN) Sadong Jaya, Aidel Lariwoo ba Aum Kunsil Nengeri Hari ti Ke-6 Penggal Kedua, ditu ensana.

Iya nambah, urung 600 buah palan udah diungkup di Sarawak nengah inisiatif ‘Kampung Tanpa Wayar’ enggau 210 buah palan udah dipejalaika diatu.

“Perintah merambu deka nembuka masang laluh 390 palan datai ba ujung taun tu ila,” ku iya.

Kelimpah ari nya mega, iya madah perintah mega ngemansangka pengawa nirika legit telekomunikasyen ke baru dikena ngepunka servis 3G enggau wireless broadband ke bukai baka WiFi.

Iya madah, ba Sadong Jaya, dua iti palan diKampung Tanpa Wayar udah dikemansang dalam taun 2011 ba SMK Pesantren Abdul Taib Mahmud enggau Kampung Semera, lalu dua buah palan agi udah tembu di Kampung Jaie enggau Kampung Pelandok Laut.

Ba servis selular ba sekeda kampung ke dipadah ADUN Saribas, ku iya, sebuah legit telekomunikasyen udah digaga di sitak Tanjung Assam pun taun tu tadi enggau perambu suba mungkur Kampung Tuie enggau Kampung Manggut.

“Ari di peratika, ba penegp bungkur selular ari tiang nya ngayanka bungur Kampung Tuie enggau Kampung Manggut enda berapa manah.

“Berindik ari nya, taun tu kitai deka ngemanahka agi bungkur selular ba kededua kandang menua nya,” ku iya.

Ngenang kuasa karan ke suah putus ba sitak Sadong Jaya, Awang Tegah madah, Sarawak Energy Berhad (SEB) udah ngaga sekeda chara dikena nyeliahka penanggul tu baka nukar aerial cable, meresi kandang endur tiang lekterik.

Ari rikut SESCO ngayanka pengawa tu bisi udah manah, enti dibanding enggau taun 2011, ke suah endar nadai karan manggai semilan kali sebulan enti dibanding enggau ari bulan Januari ngagai April taun tu, ke nadai sekali pen penanggul baka nya.

Taja pen udah bisi manah mimit ba karan, SEB deka terus beratika kuasa karan ba sitak nya.

Kabel ke disambung n gena tiang 33kV ari Rangawang ngagai Kampung Ensengai Iban ke mungkur Sadong Jaya/Asajaya diatu 80 persin tembu, dipelaba tembu semua pun taun nyin ila.

SESCO mega ku iya, udah tetemuka 11kV kabel atas ke patut diganti kena ngemanah pejalai karan ngagai sitak Sadong Jaya/Asajaya.

Kabel ke diganti ba Sadong Jaya Ulu, Subi/Sebandi enggau Moyang Lidang udah tembu.

Ke diatu, pengawa ke agi digaga nganti kabel ba sitak Jaie, Iboi enggau Semawang deka tembu dalam bulan Julai, Sampun/Semera enggau Sampun Jugu tembu dalam bulan Oktober sereta Senangah enggau Rebak tembu dalam bulan Disember, semua pengawa tu digaga bererenggat.

Print Friendly

We encourage commenting on our stories to give readers a chance to express their opinions; please refrain from vulgar language, insidious, seditious or slanderous remarks. While the comments here reflect the views of the readers, they are not necessarily that of Borneo Post Online. Borneo Post Online reserves the right not to publish or to remove comments that are offensive or volatile. Please read the Commenting Rules.

Comments are closed.