Home - Utusan Borneo - Berita Iban - Raban mangku pengawa PBTMK ke suba meruan ngetan penuduk
Raban mangku pengawa PBTMK ke suba meruan ngetan penuduk
Posted on May 23, 2012, Wednesday
KUCHING: Aum Besai Gerempung Ex-soldadu Malaysia pampang Kuching (PBTMK) ti ke-28 mujur diatur di Dewan SIPEC ke alai raban exco gerempung nya dikearap mengkang ngetanka raban ke diatu, ku Ketuai Pampang PBTMK, Kapt (B) Mohd Saiful Abdullah.
“Enti ba pun menua, taun 2009 – 2012 PBTMK dikelala bendar, nya alai raban gerempung minta komiti tauka exco ke diatu mengkang ditanka.
“Sekali tu ba AGM kami ungkupka 2012 – 2015, barang ku raban gerempung milih enti sida iya deka ke baru tauka agi mengkang ke lama… Barang penemu raban bukai, aku sanggup nerima pemutus sida iya,” ku Mohd Saiful.
Tang taja pia, iya madah penemu sida ke ba pun menua madah, ungkup taun 2009 – 2012, entara taun ke manah laban dalam timpuh taun tu, gerempung tu dikelala bendar.
“Nya alai sida iya minta exco ke ditu ngetanka penuduk kelimpah ari gerempung tu mega deka meri kelala, penyanding penemu baru kami, Kaban Kunsil Nengeri (ADUN) Demak Laut, Dr Hazland Hipni,” ku iya seraya madah sebedau tu pengawa nya dipangku DUN Baatu Kawa ke suba, Tan Joo Phoi.
Ku Mohd Saiful, Dr Hazland sigi udah lama begempung enggau PBTMK kelimpah ari seiku orang ke seruran ngelalau gerempung nya muka koperasi kena ngangkatka gerempung nya.
Ba atur pengawa makai lemai PBTMK Hari Enam tu tadi, Dr Hazland ngungkup RM7,700.77 ngagai gerempung nya.
Ke diatu, penyampau kaban ke udah masuk PBTMK manggai 675 iku lalu dalam kandang taun tu, sida ngarapka peyampau nya deka nambah ngagai 1,000 iku.
Kelimpah ari nya mega, Gerempung Veteran Soldadu ke enda Pinchin (KVTTB) deka ngerejister gerempung nya ke diungkup kena ex-soldadu ke enda pinchin, iya nya ex-soldadu ke badu ari pengawa tumu agi ari timpuh umur pinchin.
“KVTTB tu sebengkah gerempung ke baru sereta disadang Opis Menteri Besai ke diungkup kena ex-soldadu ke enda pinchin,” ku iya.
Iya nambah, rambai jaku ke dikena PBTMK sekali tu ukai, ‘Jasamu Dikenang’ tang deka ditukar ngagai rambai jaku ke bekaul enggau ‘Bebantu bela diri nuju pemujur,’ ku iya.
“Ukai kami enggai dikenang tang kami minta ex-soldadu ke udah mujur tauka udah nyadi towkay ulih mantu raban bukai ke kurang pemisi,” ku iya.
<< Previous Entry - Next Entry >>
