Opis tu chakah mantu orang ke deka bekebun getah bedandang mit nambak tampang pelai
KUCHING: Orang ke bekebun getah bedandang mit ti mungkur pemesai tanah kurang ari 40 hektar diperansang ngatur kerejasama enggau Opis Pemansang Betanam Getah Bedandang Mit (RISDA) ba pengawa nambak baru tampang getah pelai.
RISDA mega deka meri bantu RM13,500 ungkup sehektar tanah kelimpah ari meri sabsidi baja sereta bantu teknikal ti bukai.
Sapit Direktor RISDA Ahmad Sufi Alias madah ijinsi nya nagit deka bejalaika pengawa nanam baru getah ba tanah sepemesai 5,000 hektar dalam taun 2012 tu.
“RISDA angkun nyaup orang bekebun getah bedandang mit ngangkatka tikas penatai pemisi ninting bulan. Bemacham bantu nyengkaum meri mata duit sereta sekim sabsidi baja kelimpah ari bantu teknikal.
“Ba taun 2012 tu, RISDA nagit deka nanam enda kurang ari 5,000 hektar tanah ngena tampang baru PB 350 ti jampat besai sereta tau ditangkal dalam timpuh 4 1/2 taun,” ku iya
Kelimpah ari nya, RISDA mega deka meri bantu RM13,500 ungkup sehektar tanah, sabsidi baja sereta bantu teknikal ti bukai ti tau nyungkak asil sereta penatai pemisi orang bekebun getah di menua tu, tandu iya.
Iya mansutka penerang tu sepengudah bejadika pengawa Nyua Kunchi 3 buah entukar RISDA pampang Sarawak ti diatur ba indu opis ijinsi nya di Jalai Kulas ditu, kemari.
Ku iya, RISDA angkun nyaup orang bekebun getah bedandang mit sereta nagit manggai ba taun 2015 raban tu deka teulihka pemisi enda kurang ari RM2,500 sebulan.
“Diatu, menua Sarawak ngemansutka urung 800 nyentuk ke 900 Kg getah ungkup sehektar tanah dalam timpuh setaun.
“Enggau penyampau tanah endur nanam getah ti majak ditambah, kitai nagit asil tu deka manggai ba tikas 1,750 KG sehektar dalam timpuh setaun ba taun 2015.
“Enti tu mujur dijapai, orang bekebun getah deka teulihka penatai pemisi RM2,500 sebulan,” ku iya.
Iya mega madah, 95 persin asil getah menua Malaysia datai ari orang bekebun bedandang mit lalu laluh 5 persin dikenataika estet getah.
Dulu ari nya, Direktor RISDA Sarawak Wahid Marikan madah siti program nanam getah ba tanah NCR ti keterubah deka dipejalai di Tanjung Bundong, Samarahan bulan Julai tu ila.
Program ti mungkur tanah sepemesai 200 hektar nya dipasuk urung 120 iku orang ke ngempu tanah NCR.
“RISDA deka ngatur program keterubah nanam getah ba tanah NCR sepemesai 200 hektar ba Tanjung Bundong, Samarahan ti dipasuk 120 iku orang ke ngempu tanah.
“Kelimpah ari nya, naka ke diatu bisi 4,500 iku pekebun bedandang mit serata Sarawak udah bekerejasama enggau RISDA nanam baru getah ngena leka benih ti manah sereta tau ditangkal dalam timpuh 4 1/2 taun sepengudah ditanam,” ku iya.
Kami ngansak mayuh agi pekebun bedandang mit ngatur kerejasama enggau RISDA ba pengawa nanam baru purih getah ke manah ngambika tau nyungkak penatai pemisi sida, tandu iya.