Sukut Dayaidup Iban – Atur pengawa ngintu Hari Gawai

0

GAWAI Dayak siti ari bengkah pengerami ti diintu raban bansa Dayak baka Iban, Bidayuh, Kadazan, Dusun. Enda tinggal mega diintu ari raban bansa Orang Ulu baka Lun Bawang, Kenyah, Kayan, Kelabit, Punan enggau Penan.

Gawai Dayak diintu pengudah musin ngetau padi. Kelimpah ari Gawai Dayak, mayuh agi gawai bukai ti bisi diintu kelebih agi ba raban bansa Iban.

Bengkah gawai ti bisi diintu iya nya Gawai Antu, Gawai Burung, Gawai Besimpan, Gawai Mangkung Tiang, Gawai Kenyalang, Gawai Sakit, Gawai Sandau Hari, Gawai Lelabi, Gawai Kelingkang enggau Gawai Tuah. Dalam setiap gawai nya bisi reti iya empu lalu adat enggau chara ngintu setiap bengkah gawai nya enda sama.

Gawai Antu diintu maya bisi pemati. Gawai Burung diintu maya bisi jai mimpi tauka salah burung. Gawai Besimpan diintu pengudah tembu musim ngetau. Gawai Mangkung Tiang diintu maya nepan rumah baru. Gawai Kenyalang diintu kena ninding diri lalu Gawai Sakit dikena maya pengawa bedukun tauka bemanang. Gawai Sandau Hari diintu maya bulih dengah. Gawai Lelabi diintu maya pengerami melah pinang. Gawai Kelingkang siti ari ripih Gawai Kenyalang lalu Gawai Tuah diintu maya bulih tuah.

Nyadi, Gawai Dayak deka disambut ujung bulan Mei enggau pun bulan Jun tiap taun. Hari besai ngintu Gawai Dayak iya nya 1 Jun ninting taun.

Ba dalam seseiti ruang bilik, sebedau Hari Gawai nyadi, maya malam 31 Mei nya raban bansa Iban udah sedia ke perengka kena nyambut Hari Gawai. Bala sida ke indu udah tembu begagaka penyaram, kuih chuan, kuih jala, ai tuak sereta mayuh agi.

Maya malam 31 Mei nya, enti nitihka adat raban bansa Iban, perengka miring disedia kena ngintu pengawa miring. Teresang digaga ari buluh udah mega didirika di luar rumah. Manuk idup mega bisi disedia kena bejalaika pengawa nyelup.

Urung jam udah manggai ba pukul12 tengah malam, dia pengerami Gawai nyadi. Tawak dipankung bejejurut kali dikena nandaka ari Gawai udah nyadi. Ba kemaya hari tu, ukai semina tawak aja dipangkung, tang merchun mega ditebah kena nandaka Hari Gawai.

Nitihka adat raban bansa Iban pengawa miring endang sigi bisi diintu ba tiap ari nyadi Gawai. Pengawa miring dipejalaika bala ke nemu ba senentang pengawa miring. Pengudahnya, piring lalu dianjung ba teresang ti udah disedia.

Manuk idup lalu diambi dikena bebiau. Pengawa bebiau nya mesti betuaika orang ti landik dalam leka biau. Dalam sampi leka biau nya kitai selalu ninga orang minta petara meri tuah meri limpah, minta pengerai sereta panjai umur. Udah nya manuk tadi lalu disayat, darah manuk nya disimpan dalam mangkuk. Udah nya bulu manuk nya dichabut dua tauka tiga iti. Darah ke lekat ba bulu manuk nya tadi dikena nyelup bak tapak jari setiap iku orang ti bisi dalam seseiti ruang bilik. Pengawa tu ripih ari pengudah pengawa miring enggau bebiau.

Pengudah nya ai tuak pan lalu disadung. Ai tuak nya tadi udah disampi tauka diberkat dikumbai Ai Pengayu. Semua mensia ti ngintu Gawai Dayak mesti ngirup Ai Pengayu ngambika gerai sereta panjai umur.

Chara Ngintu Pengerami Gawai Di Rumah Panjai

Ba adat seseiti rumah panjai, chara nganjung piring bisi nyelai mimit. Urung ari udah tawas, enti jam udah manggai ba pukul 7 pagi, betuaika Tuai Rumah (TR), lalu ditangkanka enggau raban ti bisi dalam rumah panjai nya miring ba ruai tauka ‘tanju’. Perengka miring nya mega bisi sekeda iya baka kuih penyaram enggau ai tuak dikena meri sembah ngagai bala Petara. Pengudah nya TR tauka seiku ti dipilih nyadi Tuai dalam pengawa miring nya lalu nyayat manuk. Pengudah nya darah manuk lalu disengkelan ba atas piring nya tadi. Udah nya piring lalu dianjung tauka disimpan ba ‘Tiang Pengingat’. Enti Pengawa Miring ba rumah panjai nya udah tembu, nya nandaka pengerami ngintu Hari Gawai udah belabuh nyadi.

Belabuh pagi 1Jun, dia TR mai bala raban bukai ngaga ranyai di tengah – tengah ruai. Ba ranyai nya tadi mega ditugung ke mayuh bengkah utai empa. Mensia mayuh tau rami bebuti, belagu, ngirup tauka betanda ngelingi ranyai nya.

Pengawa bukai bisi mega diatur dalam pengerami Gawai Dayak, enda nyalah baka nyabung manuk, ngajat, ngatur Pekit Kumang enggau Keling, tauka Pekit Karaoke sereta mayuh agi bengkah main asal ti bisi diatur.

Ba pengerami Gawai Dayak mega kitai selalu meda raban Iban bepasukka ngepan Iban. Pia mega enggau raban bukai baka Kadazan, Orang Ulu semua mantaika pemanah ngepan diri empu ti udah digaga nyadi adat pesaka turun temurun setiap pupu bansa.

Bala Pengabang semua diasuh datai lebuh maya nyambut pengerami Hari Gawai. Sida ditungaka utai empa baka asi ruas, pansuh manuk tauka babi, kuih, ai tuak sereta mayuh bengkah ari utai empa bisi ayan. Setiap iku bala pengabang ti bisi datai disambut enggau manah sereta pulai enggau perut ti kenyang.

Pengerami Hari Gawai deka badu diintu enti pengawa ‘Ngiling Bidai’ tauka mayuh agi orang ngena tikai ti dikumbai orang ‘Ngiling Tikai’ udah dipejalai. Pengawa Ngiling Bidai tauka Tikai nya pengawa ti penudi kena nutup Gawai. Sekali agi ranyai duduk ba tengah – tengah ruai dibuka tauka direrai, lalu Gawai udah badu diintu.