Home - Utusan Borneo - Berita Iban - Kompeni patut nyeliah betebangka kayu ba kandang pengentap pendiau
Kompeni patut nyeliah betebangka kayu ba kandang pengentap pendiau
by Rengenyan Labang. Posted on June 20, 2012, Wednesday
KUCHING: Enti kandang nya (pengawa endur nebang kayu batang) nyerangkung palan pengentap pendiau raban mensia, Opis Kampung dipinta ningkilka pemendar ari lisin nya.
Menteri Pengatur Pemansang Pengeraja Asal enggau Rampa Menua II, Datuk Amar Awang Tengah Ali Hassan madah, nya nyerangkung Palan Pengentap Pendiau Baru (BRS) Bengoh.
“Lisin batang udah dikemendar ba tanah nengeri di Bengoh. Opis Tanah enggau Survey udah mansik pemendar tanah nya.
“Taja pia, enti kandang nya nyerangkung palan pengentap pendiau baru raban mensia ke kena bungkur Tekat Ai Bengoh, Opis Kampung deka dipinta ningkilka pemendar ari lisin nya,” ku iya.
Awang Tengah mansutka pekara nya dalam penerang berita, lebuh dipinta pengarang berita ngenang orang ti nguji tama enda beradat ngagai tanah NCR entara Kampung Semadang enggau Kampung Giam, ba sebengkah pengerami ditu, kemari.
Iya madah, pengawa betebangka kayu endang dikemendar, sekalika ba estet kampung tetap, tanah nengeri, tanah ke udah disukat, tanah galau bansa asal tauka tanah adat bansa asal (NCR).
Ba tekat ai ke udah digazet, pengawa nebang kayu tau dikereja ari baruh Pekara Keterubah Pengeraja Asal enggau Rampa Menua, 1997, ku iya.
Nambahka nya iya ti mega Menteri Perengka Guna Mensia Mayuh madah, lisin batang patut meri riput ngagai NREB. Riput EIA enda tau enda disediaka orang ke landik ba pekara nya.
“Lisin nya enda tau enda nitihka atur ke terit sereta nyeliahka pangka ke tau ngeruga pemanah rampa menua, maya kompeni nya bejalaika pengawa betebangka kayu,” ku Awang Tengah ke mega Menteri Pemansang Industri.ax
<< Previous Entry - Next Entry >>
