Home - Utusan Borneo - Berita Iban - Pengerami Tanda Rayat Sedunya diperambu diatur di Sibu: Abg Jo
Pengerami Tanda Rayat Sedunya diperambu diatur di Sibu: Abg Jo
by Judan Bungap. Posted on June 20, 2012, Wednesday
SIBU: Pengerami Tanda Rayat Sedunya deka diatur ba sitak tu lalu nyadi siti pengerami besai ba kalinda dagang temuai nangkanka Pengerami Main Asal Borneo (BCF).
Perambu nya dibantaika Menteri Pengawa Berumah ke lalu nyadi Menteri Dagang Temuai Datuk Amar Abang Johari Tun Openg maya bejadika Palan Pesaka Tuai Sibu ditu, kemari.
“Ba Kuching kitai udah bisi Pengerami Muzik Hujan Sedunia, Pengerami Jazz (Miri), Pengerami Nerebaika Gudi (Bintulu) lalu diatu Sibu deka bisi pengerami besai baka tu.
“Perambu tu udah dipadahka aku ngagai Chairman Opis Kunsil Sibu (MPS) Datuk Tiong Thai King lalu diatu bepanggai ba iya empu ngaga pemutus,” pia ku iya madah.
Perambu nya mega, ku iya deka dibai ngagai Opis Dagang Temuai (STB).
Bekenangka pengawa sehari nya, ku Abang Johari, tu sebengkah ari chara ke badas dikena ngentan sereta ngintu pengeraja asal menua tu.
“Enti udah bisi palan baka tu…nama ke beguna iya nya kitai ngarapka mensia mayuh ulih datai kitu beratika penyerakup ke bisi ba Sibu kenyau ari dulu suba,” ku iya.
Palan Pesaka Tuai Sibu mega kenu iya tau nyadi sebengkah ari palan alai nemuai ngagai menua Sibu.
Taja pan baka nya, raban ke bekaul enggau dagang temuai ba sitak tu aruh ransing sereta kreatif agi.
Tu nyengkaum pengawa nyediaka pakej, makit dagang enggau publisiti dagang temuai tu dikena narit bala temuai ari menua luar mayuh agi datai ngagai palan nya.
Bela bisi datai maya pengerami tu iya nya Kaban Kunsil Nengeri (ADUN) Nangka Dr Annuar Rapa’ee enggau Sapit Chairman MPS Daniel Ngieng Kiong Ann.
<< Previous Entry - Next Entry >>
Advertisement
