Home - Utusan Borneo - Berita Iban - Raban Nembiak 1Sarawak berami ngiling tikai di rumah panjai Iban
Raban Nembiak 1Sarawak berami ngiling tikai di rumah panjai Iban
Posted on June 20, 2012, Wednesday
MIRI: Rumah Nunong Sigat, Nanga Jella, Lambir berami Ngiling Tikai enggau raban nembiak 1Sarawak empai lama ke udah.
Ba pengerami nya, 40 iku nembiak ari raban nembiak 1Sarawak mantaika main asal.
Tuai rumah Nunong ke nyadi tuai rumah alai ngintu pengerami nya madahka pengerami nya nyadika pelasar ke manah ungkup nembiak ngulihka peneleba pengaya main asal bansa Iban.
“Tu mega awak ungkup peranak rumah panjai begulai enggau nembiak ke datai ari mayuh bengkah endur di nengeri, enggau nya deka negapka sereta ngemanahka kaul,” ku iya.
Berebak enggau nya mega, iya madahka nembiak bisi awak ngasaika pengidup nengah program nyemilik.
“Nembiak 1Sarawak ngulihka peneleba ngasaika penusah redak rumah panjai ngemeranka pengawa sida besesehari dibanding enggau sida ke diau di mengeri, “ ku iya.
Nambahka nya mega, pengerami nya muka awak ngagai peranak mengeri meretika adat asal Iban lebih agi ba pengerami Ngiling Tikai.
“Ba pengerami nya, raban nembiak diberi peluang ngetas Ranyai enggau ngajat,” tambah iya.
Nunong arapka ila lusa, pengerami ke sebaka deka diatur dikena mandangka main asal enggau adat asal bansa Iban ngagai raban bansa bukai di nengeri tu pia mega ngagai raban temuai ari menua tasik.
<< Previous Entry - Next Entry >>
Advertisement
