Home - Utusan Borneo - Berita Iban - Semua bansa Iban aruh temegah baka orang bukai
Semua bansa Iban aruh temegah baka orang bukai
by Churchill Edward. Posted on June 20, 2012, Wednesday
PATUT TEMEGAH: Mawan (duduk, tengah) diapit Dr Bromeley (kiba) enggau Dr Rosita sereta Langgu (bediri, empat kanan) begambar begulai enggau seraban 15 iku bansa Iban pengudah nerima setipikit tembu kos belajarka Urup Iban.
KOTA SAMARAHAN: Raban bansa Iban patut bendar temegah baka sekeda bansa English, Thai, Jepun, Korea, China tauka India berindik ari penengkebang Urup Iban tauka disebut Urup Dunging.
Nengah urup nya mega tau mandangka bansa Iban dikelala ba serata dunya
Ari nya, mayuh agi program patut diatur ngambika mata mensia tau meda tauka pending tampak agi dinga, ku Menteri Pemansang Rama Tan Sri William Mawan Ikom ba peransang iya maya bejadika pengawa nyuaka Setipikit Tembu Belajar Urup Iban (Dunging) ba palan SACRED (Special Interest Group for the Advancement of Cultures and Revitalisation of Ethnological Studies of the Dayaks) UiTM Sarawak ditu, ensana.
Mawan ke mega menteri kanan sereta penyanding penemu Forum Jaku Iban (FJI) 2011 ngelaluka saup ari semua bansa Iban
Saup ba program tu berat agi ngagai bansa Iban enti sida deka meda sereta ngasaika pemujur enggau pemansang Urup Iban ba dunya diatu, ku iya.
“Kitai ngemeratka kerejasama ari semua bansa Iban ke rinduka jaku diri, gerempung ke bekaul, universiti sereta opis pelajar ngelaku lalu ngemansangka Urup Iban tauka Dunging tu. Kita aruh ngatur mayuh program, pejurai penemu ninting taun sereta ngeamatka semua jaku,” ku iya mantang.
“Nadai iran enti Urup Iban ulih ngerandang jalai nuju penumbuh Sekula Iban tauka Tampai jemah ila. Nya ulih tampai kitai diatu,” tandu iya.
Ngenang penangi penanggul pemansang jaku Iban diserak enggau politik, Mawan ngarapka juluk ngemansangka program tu enda dibalut penemu kepapas.
“Aku arap, pengawa ngemansangka jaku Iban nengah sistem urup enda dibai bebalut enggau pekara politik sekeda orang. Semua pengeran tu aruh dipekunsi enggau semua raban bansa sereta perintah ke diatu,” lalau iya.
Urup ke ditengkebang nya enda patut disimpan ke pandang di muzium aja tang aruh bendar dipelajar srerta dikerembai enggau naka ulih, ku iya.
“Aku pechaya, Urup Iban tauka Dunging ukai utai disimpan dalam muzium tang patut nyadika perengka dikena kitai berandau,” ku iya.
Mawan madah, penemu belajarka Urup Iban tu bepun ari Forum Jaku Iban 2011, ke diatur di Hotel Four Points kena 17 September taun nyin kemari.
Maya forum nya ke digulu urung 400 iku kah mensia ke dipilih ari serata Sarawak. Lebuh nya Urup Iban nya patut dikemansang sereta maya nya mega Sapit Kepala Menteri Datuk Patinggi Alfred Jabu Numpang nanggi ngambika semua komiti FJI belajarka 59 macham urup nya..
Chairman SACRED, Assoc Prof Dr Bromeley Philip begulai enggau komiti Forum Jaku Iban 2011 nerima enggau ati tebuka tanggi belajarka urup nya ke berengkah bulan Oktober 2011.
Dr Bromeley nyadi pengajar, FJI 2011 begulai enggau sekeda nembiak UiTM nyadi nembiak belajarka urup nya.
“Pengawa komiti FJI 2011 enggau Dr Bromeley ngepunka pelajar nya ba UiTM Sarawak, sepekara ke patut dikemegahka raban bansa Iban,” ku iya seraya muji Dr Bromeley ke udah numbuhka SACRED dikena ngemajuka jaku Iban.
Nyerumba pengawa nya mega, Mawan bejadika bup ‘The Iban Alphabets’ ke ditulis Dr Bromeley
Dulu ari nya, iya mega nyuaka bantu RM5,000 ari Opis Menteri Pemansang Rama sereta RM2,000 ari komiti FJI 2011 ngagai SACRED. Iya mega nyanggup meri RM5,000 ari iya empu dikena mantu program nya.
Lima belas iku raban Iban keterubah mujur nerima setipikit sida mandangka penembu kos belajarka Urup Iban.
Bela bisi ngulu pengawa nya, Sapit Rector UiTM (Academic & Internationalization) Assoc Prof Dr Rosita Suhaimi ke ngarika Rector Prof Dato Dr Jamil Hamali enggau chairman SACRED Assoc Prof Dr Bromeley Philip sereta penyanding penemu komiti FJI 2011 Dato Sri Edmund Langgu Saga.
<< Previous Entry - Next Entry >>
