Home - Utusan Borneo - Berita Kadazan - Duwo nosindualan, upis SOGT tinutudan
Duwo nosindualan, upis SOGT tinutudan
Posted on June 21, 2012, Thursday
KOTA KINABALU: Duwo tulun Korea om iso upis id tapak pamansaian, nopunso kikotumbayaan tinutudan id pinioduhan kapaamung do duwo tinimungan pakaraja id Terminal Tumau om Gas Sabah (SOGT) id Kimanis konihab.
Kinantakan kiikira pialatan jam 10.30 gisom 11.30 kosuabon dino nokopongimbulai kinatangkangauan ratusan pakaraja id SOGT om pinoboros nogi do nantakan pioduhan pogului nantakan kinotutudan dino.
Kinoilaan id timpuuni dino kiikira jam 8.15 kosuabon, kiikira 30 kusai ih pakaraja id iso komponi Korea do hilo pinapaharo do ‘piket’ miampai gaab popolombus topurimanan amu asantaban ginawo sabap ponompuanan au osonong om kararalanon pambayaran di odomut.
Songulun mantad bakas pakaraja nakalaid id komponi dino nokomoi kalapas dino suminuang daa upis dino miampai tujuan maganu barang-barang dau nga tinogod di pakakaraja tulun songkosuwaian do hilo.
Haro piipiro minit kalapas dino nantakan pisingkiwalan kapaamung do bakas pakaraja dino nokomoi miampai touki om nokopongimbulai do pinioduhan.
Sontimungan pakaraja tulun songkosuwaian id siriba touki pinoboros nogi nakaamung miampai pinioduhan dino gisom ino nopupusan miampai upis dino nokomoi tinutudan kiikira jam 11 kosuabon konihab.
Kinoilaan nogi korita touki Korea dino nakawalun sabap rinaag di sontimungan pakaraja ih nakaamung id pinioduhan dino.
Idsuang ahal dino, Luguan Koupisan Ponoriukan Jinayah (KJSJ) Sabah, Senior Asisten Komisioner Omar Mammah ontok romuto pinopotopot do kinantakan dino.
“Nokotorimo tokou ruputan mantad kokuasaan pulis Papar ih minoboros do kiharo pinioduhan id tapak pamansaian dino.
“Poingkuro poh nga kakaal magandad tokou do ruputan kimia om ponoriukan turus papanaon miampai osoriuk montok mongilo natadon totopot kes diti.
“Nokoilo nogi oh pulis do duwo tulun songkosuwaian nosindualan id kinantakan dino nga baino id kooyuon ‘stabil’ id Hospital Watas Papar,” ka dau.
Koupisan Bomba omManampasi Malaysia (JBPM) Papar ontok romuto minoboros nokotorimo oh kokuasaan diolo do pamalahauan id jam 11.02 kosuabon.
Duwo korita miampai kagarasan turu puru pinaatod om bomba nokorikot kiikira jam 11.19 kosuabon id tampat kinantakan.
“Kinotutudan kapaamung do iso linominon upis om soira nokorikot do hilo noilaan do bomba oh linominon dino 80 paratus noh notutudan.
“Nopisok tapui kinotutudan dino kiikira jam 12.13 tangadau om kaparagatan dino nasalasai id jam 2.57 sosodopon,” ka di moboboros bomba dino.
<< Previous Entry - Next Entry >>
