Peminta rumah jauh ngelui ari ke diungkup

0

PEMANSANG: (Ari kiba) Abdul Rahman, Rauf, Francis, Abang Johari, Karim enggau Hazlan beratika kar perambu pemansang Bandar Baru Muara Tebas nyengkaum program RMR Muara Tebas. — Gambar Jeffery Mostapa

Pengawa ngaga 192 unit RMR di Bandar Baru Muara Tebas deka tembu ujung taun 2013

KUCHING: Taja peminta jauh ngelui ari penyampau ke bendar, perintah ngungkup 192 unit Rumah Mesra Rayat (RMR) di Bandar Baru Muara Tebas.

Menteri Pengawa Berumah, Datuk Amar Abang Johari Tun Openg madah, program RMR nya sebengkah ari perambu pemansang di Muara Tebas.

“Rumah Mesra Rakyat (RMR) ti digaga ba Muara Tebas tu semina 192 unit, tang bisi 500 iku orang ke udah nganjung peminta (RMR), tu nunjukka sambut manah ari rayat ngagai program RMR ti dipejalaika perintah.

“Konsep RMR Muara Tebas lain ari RMR ti udah digaga tang rega agi sama.

“Diatu projek RMR Muara Tebas benung dalam renggat keterubah iya nya kereja infrastruktur baka meresi palan enggau ngisi tanah, kereja luar enggau infrastruktur sivil, sistem retikulasyen ai sereta masang perengka elekterik luar enggau sistem parit ti dipelaba tembu 31 Ogos 2012,” ku iya seraya madah projek tu berengkah dipejalai empat taun ti udah.

Abang Johari ti mega Menteri Dagang Temuai bejaku munyi nya ngagai pemberita ba aum pengarang berita, pengudah iya ti ngabas Palan Projek Bandar Baru Muara Tebas ditu, pagi kemari.

Nambahka nya ku iya, program RMR Muara Tebas meri awak ngagai rayat ba kandang menua nya ngasaika pemansang enggau pengelantang pengidup.

“Sida ba Muara Tebas ulih meli rumah nitihka penatai pemisi sida baka meli rumah teres tauka banglo kelimpah ari meli RMR,” ku iya.

Ku iya, perambu pemansang di Muara Tebas deka dipejalaika beserunyut nitihka timpuh iya nya dikemansang urung lapan ngagai sepuluh taun tauka 12 renggat.

Program RMR Muara Tebas kerejasama entara  Perintah nengeri (komponen tanah & infrastruktur) enggau perintah besai (komponen rumah).

Projek renggat keterubah ba tanah 16 ekar pemesai nya dipejalaika Perbadanan Pembangunan Perumahan (HDC) sereta 192 unit RMR Muara Tebas dikemajuka Syarikat Perumahan Negara Berhad (SPNB).

Rumah ke berega  RM55,000 seunit dipelaba tembu pengujung taun 2013.

Nitihka penerang iya, kompeni mega ngambi bagi ngemansangka palan projek Bandar Baru Muara Tebas baka ngaga palan komersial, kelimpah ari perintah ti ngaga rumah.

Bela datai nyempulang Abang Johari, Menteri Muda Pengawa Berumah Datuk Francis Harden  enggau Abdul Karim Rahman Hamzah, Kaban Kunsil Nengeri (ADUN) Demak Laut Dr. Hazland Abang Hipni sereta Chairman HDC Datuk Dr. Abang Abdul Rauf Abang Zen enggau ADUN Pantai Damai Dr. Abdul Rahman Junaidi.