Home - Utusan Borneo - Berita Iban - Opis Menteri ngintu pendiau rayat aruh ditumbuh: Masing
Opis Menteri ngintu pendiau rayat aruh ditumbuh: Masing
Posted on June 23, 2012, Saturday
KUCHING: Perintah menua patut lengkas agi numbuhka Opis Menteri tauka ijinsi ngemataka pengelantang pendiau raban ke dipindahka ngagai Palan Pengentap Pendiau Baru tauka Skim Penempatan Semula (SPS) ti kena bungkur projek tekat ai sekalika ungkup kuasa karan (HEP) tauka dikena nyambung ai.
Langgur penemu nya dipansutka Menteri Pemansang Tanah Tan Sri Dr James Jemut Masing.
Ku iya, injinsi nya patut ditumbuhka enggau lengkas ngambika bisi ngintu raban orang ti dipindahka ngagai palan pengentap pendiau baru sereta nyeliahka sida ari ti enda dikeibuhka.
“Aku udah mantai langgur penemu tu ngagai kabinet sebedau tu lalu Opis Menteri tauka ijinsi nya patut ngintu orang ti dipindahka ngagai SPS ke kena bungkur projek HEP tauka nyambung ai baka ba projek Bengoh,” pia ku Masing madah ngagai The Borneo Post ditu kena Hari Lima minggu nyin kemari.
Ku iya, penemu nya enda dikeibuhka, tang diatu pengawa numbuhka opis nya beguna amat laban mayuh agi tekat ai deka digaga dudi ila.
“Baka ke diatu orang ti dipindahka ngagai palan pengentap pendiau baru nya enda dikeibuhka laban nadai sebengkah opis menteri tauka ijinsi ngemataka pengelantang pendiau sida,” ku iya.
Masing bejaku munyi nya lebuh ke ngenang berita ti dipansutka ba lambar mua The SundayPost ke mantaika gaya pendiau raban ti dipindahka ngagai palan pengentap pendiau baru ba Sg Asap ke madahka diri kena tipu ba empat bengkah pekara baka ari segi tanah enggau penyampau duit pampas, perengka kena ngaga rumah, pemeri senentang sekulasip nengah Wang Turu Bakun (BTF) sereta kurang peluang ngisi pengawa puang.
Masing ke mega chairman BTF madah, baka ke ngelama tu sekulasip nya diberi ngagai nembiak ke ulih nampung pelajar sida ngagai palan pelajar tinggi ke diaku perintah.
“Ngelama tu kami meri sekulasip setaun ngagai nembiak ari pelilih mit menua Belaga, udah nya sida tau nginjau duit ari Wang Turu Pelajar Tinggi Bansa (PTPTN),” ku iya seraya madahka BTF ditumbuhka ngelama 13 taun sepengudah Bakun HEP diambi perintah.
Ba senentang pampas tanah, Masing madahka ba kandang menua semak enggau Belaga tiga ekar tanah udah diungkupka ngagai sebuah ruang bilik.
“Baka nya mega senentang pampas mata duit, sida anang irau ati sereta ngumbai diri kena tipu semadi meh tanah sida bisi bekaul enggau Kot.
“Aku ngelalau sida mutarka pekara tanah sida nya ba Kot ngambika sida ulih nerima duit pampas nya,” ku iya.
Senentang penyampau jelatung ke majak mayuh ditumbuhka raban nya sepengudah ai ba tekat nya diisi kena 13 Oktober 2010, Masing madahka patut bisi garis lalau sereta sebengkah ijinsi megai tanggungpengawa ngatur pekara nya ngambika ai danau nya enda kamah sereta nagang pengawa numbuhka rumah enggau nadai pemendar majak nyadi.
“Enti kitai jenuh diri aja, pekara nya deka nyadi pekara ke besai jemah ila,” ku iya.
Diatu 200 buah jelatung udah ditumbuhka raban orang ti dipindahka ngagai palan pengentap pendiau baru ari Sg Asap nya ke madahka diri nadai agi endur berikan, ngasu sereta betanam.
Bisi mega jelatung nya dibali sida endur bejalaika program nyemilik.
Masing mega ngelalau raban nya ari Sg Asap anang kelalu milih pengawa laban baka ke diatu mayuh endar ladang sawit udah ditumbuhka ba kandang menua nya.
“Aku ngelalau sida anang kelalu milih pengawa. Kami udah netapka gaji maksimun ngambika sida deka gawa ba ladang sawit,” ku Masing.
<< Previous Entry - Next Entry >>
