Home - Utusan Borneo - Berita Iban - Bansa Penan agi jauh tinggal dibelakang
Bansa Penan agi jauh tinggal dibelakang
Posted on June 24, 2012, Sunday
Gaya pengidup ke suah mindah kin kitu nekul sida mansang lebih agi ba pekara pelajar
BARAM: 1Malaysia Menteri Besai Datuk Seri Najib Tun Razak mai reti ke besai ngagai raban bansa Penan di Ba’ Balau, Baram ngambika sida ulih nyingkang sama enggau bansa bukai di menua tu.
“Kami sedar lalu nemu kami agi jauh tinggal di belakang enti dibanding enggau raban bansa bukai,” ku tuai raban bansa Tebaran Siden berandau enggau The Sunday Post.
Bisi datai mega Kaban Kunsil Nengeri (ADUN) Telang Usan Dennis Ngau Jok.
Tebaran madahka pengawa sida ke suah mindah kin kitu nekul sida mansang lebih agi ba pekara pelajar.
“Kami nemu pekara pelajar aja ulih mai pemansang sereta ubah ngagai kami,” ku iya nambahka sida udah jauh tinggal setegal ke ngamal pengidup mindah kin kitu.
Ulah apai enggau indai ke enggai jauh ari anak mega nyadika batu penekul ba raban bansa Penan maju dalam pelajar.
Dikena ngepun raban tu sama nyingkang baka bansa bukai, raban bansa Penan ba Ba’ Balau nganjung anak sida besekula di Long Seridan pejalai dua jam ari genturung pendiau sida. Laban ke udah nemu besai guna pelajar, bala apai enggau indai dia bisi minta anak mit sida dipasuk ngagai sekula anak mit di Long Seridan. Tang taja pia, peminta sida enda diterima laban nadai buding ke diungkup ngagai anak mit. Nya alai, tuai raban bansa minta ADUN Dennis Ngau meri sida palan sekula anak mit.
Gaya idup ke suah mindah kin kitu meri penanggul besai ti ngujungka anak sida enda diterima besekula sereta enda nerima bantu ari perintah.
“Mayuh ari raban bansa kami nadai ngembuan surat pengada enggau kad pengelala.
“Mayuh anak ada enda direjister di sepital tauka kelinik laban mayuh ada dalam kampung baka orang ke dulu. Nya kebuah kami pedis bisi surat pengada enggau kad pengelala,” ku iya.
Merening pekara tu,tuai raban bansa betuaika Tebaran berunding ngetu ari neruska gaya pengidup mindah kin kitu lalu ngentap diri ba Ba’ Balau. Seninjik bendar sida nerima bantu ari kompeni batang ba kandang menua nya ngaga rumah panjai enggau jematan dikena ngelayang sungai.
Ba penemuai nya, The Sunday Post meda ubah besai nyadi ba raban bansa dia laban nyau bisi rumah ke diri empu, gerija ke disediaka enggau rumah pastor (Sidang Injil Borneo ), kut sepak takraw enggau pun buah sereta sayur ditanam ba laman rumah.
Taja pan sida bisi ngemeranka pengawa betupi lebih agi baka manuk, betanam sayur enggau buah,Tebaran madahka sida agi bepanggai ba pengawa ngasu ngambika diempa enggau dijual.
Tebaran, ngarika raban bansa sida deka meri sukung ke enda begilik ngagai perintah lalu deka bekerejasama ba semua program pemansang.
<< Previous Entry - Next Entry >>
Advertisement
