Home - Utusan Borneo - Berita Iban - Pemujur dijapai PKK ngemegahka ati
Pemujur dijapai PKK ngemegahka ati
Posted on June 24, 2012, Sunday
SARATOK: Pemujur Serakup Peladang Kalaka (PPK) teulihka untung RM169,870 taun siti nyin kemari, mandangka gerempung ke udah ditumbuhka sepengelama 28 taun nya ulih besemekih dalam sosioekonomi menua.
Taja pan kenyau ari taun 2008 nyentuk ke 2010, PPK rugi RM480,304 tang udah nya ngangkatka diri baru taun siti nyin kemari nyadika kelai pemujur ngagai PPK.
Menteri Muda Perengkaguna Mensia Mayuh (Penyambung Ai) ke mega Menteri Muda Betanam Betupi (Serakup Peladang) Datuk Sylvester Entri Muran madah, semua aruh begempung ngambika pemujur enggau penguntung nya ulih ditanka belama.
“Lebuh ke megai tanggungpengawa nya, raban PPK anang semina bepanggai ba raban pengatur pengawa aja tang ngiga chara bukai dikena ngemansangka PPK. Sida patut malut diri nengah chara mantaika langgur penemu sereta meri sukung ngagai PPK.
“Diatu, pemujur ke dikereja PKK ngemegahka ati kitai. Sekeda pemujur bukai ke udah ditempa sida baka numbuhka Kedai Peladang, Projek Nerenak Paung Sawit, Projek Burung Lelayang, Program Bantu Padi enggau program bantu bukai ungkup raban gerempung nya baka perengka pengakut.
“Taun tu, PPK merambu deka meli Buah Tandan Baru (BTS) ari pekebun mit ba kandang menua Kalaka tu. Kami arapka, PPK ulih terus nyapai pemujur sereta nyadika peransang ngagai semua raban PPK,” ku iya.
Entri bejaku munyi nya lebuh ti bejadika Aum Besai Ninting Taun (AGM) kali Ke-28 ba sebengkah hotel ditu,apin lama ti udah.
Pengerami nya digulu urung 60 iku raban PPK ari komiti direktor PPK, komiti bejalaika pengawa PPK enggau 46 iku raban PPK ari sekeda endur.
Ku Entri, tuju numbuhka PPK dikena nyungkakka tikas ekonomi enggau rama, nambahka penemu enggau pengelandik, ngangkatka asil enggau pemisi sereta ngemanahka chara pengidup raban gerempung nya.
“Kelimpah ari nya mega, PPK deka nempa seraban orang betanam ke progresif, ulih gawa ngatika diri, beserakup, lantang pengidup sereta bepemisi tinggi.
“Taun tu, kami mega arapka PPK ulih nempa raban orang dagang ke mujur bejalaika pengawa dagang sereta ngangkatka nama PPK ngagai tikas ke tinggi agi,” ku iya.
Ku Chairman PPK, Syvester Gorgary Manggi madah juluk PPK iya nya bebendar deka ngemansangka Gerempung Peladang, nyendia sereta meri servis ke manah dikena ngemujurka industri betanam betupi ba raban gerempung nya.
Iya mega meransang semua raban gerempung belajar ari pengawa sida ke enda mujur suba sereta nentuka pekara ke baka nya enda nyadi baru ila.
Beserimbai enggau pengerami nya mega diatur pengawa milih komiti PPK ke baru sereta nyuaka setipikit ngagai raban komiti PPK taun 2010 enggau 2011.
<< Previous Entry - Next Entry >>
Advertisement
