Home - Utusan Borneo - Berita Iban - Tiga bengkah kompeni dikemendar nungkap emas di Bau
Tiga bengkah kompeni dikemendar nungkap emas di Bau
Posted on June 24, 2012, Sunday
KUCHING: Perintah Sarawak udah ngemendarka tiga bengkah kompeni bejalaika pengawa nungkap emas ba kandang menua ti baru di pelilih menua Bau.
Menteri Pengatur Pemansang Pengeraja Asal enggau Rampa Menua II, Datuk Amar Awang Tengah Ali Hasan madah, nengah pengawa nungkap emas nya ulih mantu nyungkak pemansang ekonomi menua tu.
“Dua minggu ti udah kami bisi baum lalu meri pemendar ngagai tiga bengkah kompeni bejalaika aktiviti nungkap emas ba endur baru di kandang menua Bau.
“Kitai ngarapka tu ulih ngenataika asil ngagai menua setipak enggau pelasar mineral menua ti kedua dalam nuju penyungkak pemansang ekonomi menua tu.
“Taja pia kitai ngarapka aktiviti lombong enggau kuari ulih dipejalaika ngena chara ngemeranka penyiru ngagai rayat sereta rampa menua ngambika enda ngerusak penyelai enggau pemanah asal rampa menua Nengeri Sarawak,” ku iya ti nadai madahka nama bagi kompeni bejalaika aktiviti nungkap emas nya.
Awang Tengah ti nyadi Menteri Perengka Guna Mensia Mayuh mansutka pekara nya lebuh bejaku seraya bejadika Aum Besai Geosains Bansa 2012, Gerempung Geologi Malaysia ti diatur ba sebengkah hotel ditu, pagi kemari.
Aum Besai Geosains Bansa 2012 nya berambaika leka jaku ‘Geoscience in Everyday Life’ ti ngembuan tuju meri penerang pasal geosains ngagai pengidup kitai ninting hari.
Berebak enggau tu iya madahka perintah Sarawak nyukung pengawa ngemajuka pantai di kandang menua Kuching ti ulih nyadi produk baru geosains ke diberi nama Delta Sarawak Global Geopark. “Perintah nengeri amat nyukung (Delta Sarawak Global Geopark) laban di Delta Kuching ngembuan pengaya ba utai tumbuh enggau idup, Palan Nupi Jelu Siga Matang enggau Semenggok sereta mayuh macham adat enggau main asal, senentang deka ngaga pakej nyadi palan geosains amat setipak,” ku iya.
Awang Tengah ti mega nyadi Menteri Pemansang Industri ngarapka raban geologi enggau sains di menua tu ulih chakah bejalaika tanggung pengawa di kena ngemansangka menua.
Ngenang aum besai nya, iya ngarapka semua kaban geologi enggau sains ulih meri penemu ti engkeman sebedau ngaga seberang pemutus. Bela datai ngulu pengerami nya kemari, Ketuai Direktor Opis Mineral enggau Geosains Malaysia, Presiden Gerempung
Geologi Malaysia Prof. Dr. Joy J. Pereira, Pengatur Aum Besai Geologi Bansa 2012 Dr. Richard Mani Banda enggau pemesai ke bukai.
<< Previous Entry - Next Entry >>
