KAPIT: Gaya hari ke anggat ti ngujungka kemarau urung dua minggu lebih, udah ngenusahka mensia mayuh ba pengurang ai.
Seiku ari Rumah Jacob, Sungai Menuan, Bawang Sigai madahka sida berengkah kurang ai beresi kenyau ari Hari Gawai tu tadi.
“Engai enda pan kami nyauk ai ari batang ai ngambika bisi dikena nuchi pinggai mangkuk enggau masu gari. Ukai semina nya aja, kami meli ai mineral ambika irup sereta dikena nyumai.
“Gaya hari ke anggat ngelama dua minggu lebih mega ngujungka asil utai tanam kami majak kurang. Pekara nya tau ngusutka penatai pemisi kami ke betanam,”ku iya.
Ku iya baru, dalam kandang tiga taun ke udah kami serumah kala nganjung peminta deka ngaga tekat ai ke baru, tang nyentuk ke sehari tu lalu nadai disaut ari raban orang ke bekaul.
“Aku arapka raban nya lengkas agi berundingka peminta kami nya. Enti sema kemarau tu nyadi panjai agi, mayuh endar penanggul ke deka ditapi kami baka pedis perut ketegal enda ngirup ai ke beresi tauka dikena nyumai. Kami ditu nyangka enda ulih meli ai mineral nya ninting hari laban ke jauh ari pasar,” ku iya.
Hari ke kemarau tu mega ngujungka ai sungai sungai mabu sereta ngemediska kami enti deka undur ke pasar.
Ekspress ai ari Kapit ke Balleh mega diketuka dulu laban ai nyau majak mabu.