Home - Utusan Borneo - Berita Kadazan - Projek ralan mindalan kakod Tanjung Aru-UMS timpuunan toun diti: Musa
Projek ralan mindalan kakod Tanjung Aru-UMS timpuunan toun diti: Musa
Posted on June 27, 2012, Wednesday
KOTA KINABALU: Rontob koiso projek ralan mindalan kakod kininaru 25.3 kilometer tumimpuun mantad Tanjung Aru pakaayan id Universiti Malaysia Sabah (UMS) id Likas mangan papanao toun diti, ka di Boyoon Montiri Datuk Seri Musa Aman.
Minoboros isio do projek kigatang RM38 riong ih pinabahagi doid apat rontob dino nopo nga iso mantad tolu projek ponombuluian ih nointutunan idsuang kapamanaan Koridor Kopotundaan Sabah (SDC).
Panaak boboroson id ababayan pinotimpuun Koiyonon Bawang Sembulan id sadong Jaya ih poinsumpak id boogian kapadtamangan Dewan Bandaraya Kota Kinabalu (DBKK) sodop konihab, Musa ih nogi Montiri Kousinan Pogun minoboros iso kagu projek id siriba projek ponombuluian dino nga projek pomolumisan Menara Atkinson, iso mantad tapak tungkusan kisusuain id Sabah, poingoros Padang Merdeka hiti.
Ka dau projek ih piaga-aga koponolon balanja RM12 riong dino papanaon dati do toun tiiso.
Menara Jam Atkinson ih nopongo di toun 1905 nopo nga tungkusan kinotindohoiyan susuain kiguno id Sabah doulu noh id boogian Bandaraya Kota Kinabalu kalapas sangod pomogunan koduwo.
Kokomoi projek Koiyonon Bawang Sembulan, minoboros ih Musa do projek dino nokomoi nogi nopo nga projek ponombuluian id siriba SDC ih kaampai mantad tolu rontob ih koinsasanai dino kigatang RM45 riong.
Ka dau miampai owonsoi nopo projek poingompus bawang dino, boogian Sembulan baino nokosimban noh kokikitanai katanud miampai kinoingkokoton kounalan id boogian posorili dino om nogi ‘status’ kakadaian tagayo Kota Kinabalu sabaagi kakadaian tagayo podtuongisan sandad.
Minoboros ih Musa do koporintaan Sabah ‘prihatin’ nokomoi do kawagatan kousinan om tonggungan tagayo DBKK om popopoobi do kiginumu RM19 riong kumaa DBKK montok papanau do mogisusuai projek kotundaan om koponorinaan id sorili kakadaian tagayo toun diti piagalon RM17 riong di toun nakatalib.
Ka dau iti kapaamung do kotorinaan pomuhuan sampa, karaja koponorinaan ‘landskap’ ralan tagayo, karaja koponorinaan parit tongokoodo om parit tagayo.
Pogului, Mayor Bandaraya Kota Kinabalu Datuk Abidin Madingkir minoboros DBKK maamaso mamalan ‘strategi’ montok poposodia do wayaan mindalan kakod ih lobi tosonong pakaayan id boogian misampaping miagal Muzium Pogun, Muzium Silam, Masjid Pogun, Gereja Sacred Heart om stesen keretapi ih koinsanai dino kiharo idsuang timpu 10 minit kopohompit mindalan kakod mantad Koiyonon Bawang Sembulan.
<< Previous Entry - Next Entry >>
