Home - Utusan Borneo - Berita Iban - Anang irau penyarut dalam SUPP
Anang irau penyarut dalam SUPP
by Jacqueline David. Posted on June 29, 2012, Friday
KUCHING: Anang guai irauka penyarut politik dalam Parti Sa’ati Rayat Sarawak (SUPP) tang tegapka sukung ngagai Barisan Nasional (BN) lebuh betapi enggau pengawa bepilih besai menua ke-13 (PRU 13) enda lama agi, ku Kaban Kunsil Nengeri (ADUN) Bengoh Dr Jerip Susil madah ngagai raban SUPP Bintulu enggau Kemena.
Iya madah baka tu lebuh raban SUPP ari kededua sitak tu bisi nemuai ngagai opis iya di Bangunan Baitulmal ditu, kemari.
“Pejalai sida iya betemu enggau aku laban deka nemu pasal SUPP sepengudah pengawa bepilih besai dalam parti tu tadi alai SUPP pampang Bintulu entara pampang ke enda sah ba pengawa bepilih parti renggat sitak Bintulu.
“Aku madah ngagai sida iya, semua pekara bekaul enggau penyarut parti udah dilempai ngagai Opis Pengerijister Gerempung (ROS), beri awak ngagai ROS mutar sereta mansik pekara nya dulu sebedau sebarang jaku pemutus digaga,” ku iya.
Jerip ti mega nyadi Menteri Muda Pengerai Mensia Mayuh madah pemutus ari ROS nyangka enda diputuska diatu tang nyangka deka diputar sepengudah abis PRU 13 tu ila.
“Jaku lalau ke diterima kami ari tuai pemesai BN, iya nya sebarang penyarut dalam parti, anang guai diibuhka dulu laban kediatu, parti deka meri kerejasama ngagai chalun BN ke deka bediri ba PRU 13, ngambika chalun BN ulih menang.
“Nya alai, sebarang penanggul kediatu, pemutus ROS nyangka deka digaga udah abis PRU 13,” ku iya.
Kediatu ku iya, beri peluang ngagai ROS nasat penyarut parti nya, ngambika sebarang pemutus ke digaga ila bepanggalka pemadah ke betul.
“ROS betatika pekara tu lalu sida iya bendar deka mantu kitai. Enti pemutus nya digaga ila, ngambika pemutus nya nyadi chunto lalu jemah ila nadai agi penyarut bansa nya nyadi.
“Nadai undang-undang ke bisi diatu tau dilanggar kitai ngapa. Tiap parti politik bisi atur sereta undang-undang sida iya empu. Pengarap kami ba ROS manah. Nya alai kediatu, kitai semua aruh bebendar ngambika chalun SUPP-BN mesti menang,” ku iya.
Sebedau Aum Besai Tiga Taun Sekali (AGM) SUPP ke diatur dalam bulan Disember 2011, tiap buah pampang SUPP bisi ngatur aum mit sida iya dulu sebedau ditangkan enggau AGM.
Tang aum mit SUPP pampang Bintulu, enda diterima AGM alai raban parti enda lantang ati lalu nganjung surat ngagai ROS, kediatu lalu bedau malas surat nya.
Kelimpah ari nya mega, Jerip entara ADUN ke ngarika sepiak ex-Sekretari Besai SUPP ti mega nyadi ADUN Bawang Assan Dato Sri Wong Soon Koh enggau enam iku ADUN tauka Kaban Parlimen bukai, Dr Johnicol Rayong (Engkilili), Datuk Francis Harden (Simanggang), Ranum Mina (Opar), Datuk Lee Kim Shin (Senadin) enggau Datuk Tiong Thai King (Lanang).
<< Previous Entry - Next Entry >>
Advertisement
