Home - Utusan Borneo - Berita Kadazan - Insentif’ montok papapanau teksi sinokodung
Insentif’ montok papapanau teksi sinokodung
Posted on June 29, 2012, Friday
KOTA KINABALU: Kumoduwo Ponorikohon Koisaan Mongindapu om Papapanau Teksi Rumpun Melayu Kota Kinabalu, Dullah Bache minoboros kapanaakan ‘insentif’ kiginumu RM520 maya ababayan Teksi Rakyat 1Malaysia (TR1M) nopo nga iso laang di tosonong kopio.
Ka dau, kapanaakan ‘insentif’ dino aiso tujuan ih au osonong om kaanu papagaan do kawagatan papapanau teksi.
“Sabap do songulun papapanu teksi okon ko ogumu kopio pandapatan…mantad dino tinimungan papapanau ngawi teksi kosokodung kopio om mongunsikou miampai kouhupan ih pinatahak.
“Sokurang-kurang do kawagatan aanu monginggaan doulu noh yoolo ih okurang kinasib tosonong om okon ko haro koonuonuan di togumu toiko koula montok paganakan.
“RM520 dino ula noh kirati kopio montok dagai mamaganti tayar ih obuli tumahan solinaid duwo toun,” ka dau ontok romuto do Utusan Borneo konihab.
Idsuang ahal dino, pinoposorou nogi isio kumaa toinsanan papapanau teksi ih koponorimo baucer TR1M tuh momoguno dino miampai tososonong.
“Pokionuon ku toinsanan mongindapu teksi tuh kopomoguno do poruntukan ih pinatahak dino miampai tososonong, miagal ih kopokionuon di Luguan Montiri Datuk Seri Najib Tun Razak…kada do onu ih pinatahak dino asalaan momoguno,” ka dau.
Id siriba ababayan TR1M, pinosunud di Najib do potitikid papapanau koiso koponorimo baucer subsidi tayar kiginumu RM520 montok kapangalanan apat tayar montok timpu duwo toun.
Kapanaakan insentif sosomok RM35 riong ih pataakon do1Malaysia Development Bhd dino kapanaak asil kumaa 67,000 papapanau teksi kaampai teksi bajet, teksi eksekutif, kereta sewa om teksi tutubpoon kapal tumulud id pointongkop pogun.
<< Previous Entry - Next Entry >>
