Home - Utusan Borneo - Berita Iban - Long Semadoh deka dikemansang nengah Program Nyemilik
Long Semadoh deka dikemansang nengah Program Nyemilik
Posted on June 29, 2012, Friday
KUCHING: Balai Dagang enggau Industri Dayak (DCCI) ngansak peranak menua utara Sarawak datai ngulu kos Nyemilik ke diatur ba Long Semadoh.
Sekretari Eksekutif DCCI Terence Temenggong Jayang madah urung 100 iku mensia mayuh deka datai ngulu kos nya ke diatur kena 2 Julai (Hari Satu), ti dipejalaika ba palan nitihka dipinta rayat menua nya.
Ku iya nerang, tu keterubah DCCI ngatur pengawa nya ba serata menua lalu pejalai ngagai Long Semadoh urung lima jam nengah jalai kayu batang ari Lawas.
“Kos tu deka ngubah menua di Long Semadoh, ti mungkur tujuh buah rumah panjai dikelingi bukit tinggi ti ngerinduka temuai menua tu enggau menua luar datai sereta ulih ngangkatka program nyemilik,” ku iya.
Ba Long Semadoh, menua nya diuan bansa Lun Bawang urung 4,000 iku ke diau di genturung pendiau Puneng, Trusan, Long Telingan, Long Semadoh Rayeh, Long Semadoh Naseb, Long Tanid, Long Beluyu enggau Long Kerabangan.
Tandu iya, rayat ngembuan pengerindu ngatur Program Nyemilik di menua nya bepun ari taun nyin tadi pengudah pengawa bejalai kaki sehari meraka adan Long Pa Sia di Sabah ke diatur World Wildlife Fund (WWF).
“WWF merambu genturung pendiau di Long Semadoh ulih dikemansang nengah program nyemilik ti meransang temuai menua luar datai ngagai palan nya.
“Dikearapka jemah ila, pengawa nya ulih ngangkatka pakej program nyemilik enggau pemansang ekonomi menua,” ku padah iya.
Konsultan Mahmud Sabli ti bepengelandik dalam program nyemilik dipadu bejalaika kos nya ila.
<< Previous Entry - Next Entry >>
