Home - Utusan Borneo - Berita Iban - MPP nagit 70 persin asil chukai taun keterubah 2012, ku Lo
MPP nagit 70 persin asil chukai taun keterubah 2012, ku Lo
Posted on June 29, 2012, Friday
KUCHING: Majlis Perbandaran Padawan (MPP) nagit ngumpul 70 persin ari asil chukai sepenyampau RM32 juta ungkup setengah taun keterubah 2012.
Chairman MPP Lo Khere Chiang madah penyampau ti ditagit nya enda jauh bida ari taun ke dulu alai penyampau ti dikumpul ngelui 80 persin.
“Asil ari chukai tu beguna amat ngagai MPP alai duit tu tau dikena melanja ungkus ngatur bemacham pengawa sereta dikena mayar gaji pengereja pengawa.
“Berindik ari nya, aku ngelalau mensia mayuh mayar chukai ba baruh pegai kuasa MPP sebedau 30 Jun tu,”ku iya.
Iya mansutka jaku nya ba siti aum pengarang berita sepengudah tembu aum ninting bulan MPP ti diatur ba Bilik Aum MPP, Batu 10, Kota Padawan ditu, kemari.
Nyerumba pengawa mayar chukai ti diatur sebedau 30 Jun, kaunter MPP di Kota Padawan deka dibuka Hari Enam tu berengkah
pukul 8 pagi nyentuk ke pukul 4 lemai.
Lo ba aum pengarang berita nya ngelalau mensia mayuh datai mayar chukai sida iya nitihka maya ti udah ditetapka ngambika enda kena ukum 1 persin sebulan.
Orang mayar chukai ti enda nerima tauka lenyau bil diansak betanya ngagai Kaunter Servis MPP di Bandar Baru Batu Kawah tauka betanya ngagai lumur 082-576 729.
Dikena ngemuntangka pengawa mayar chukai, mensia mayuh tau mega mayar di kaunter DBKU, MBKS, Lembaga Air Kuching (LAK), SESCO, Opis Pos, Mini Pos sereta ba semua palan dagang H & L serata Kuching.
Pengawa mayar chukai nya mega ulih diadu chara ‘online’ nengah www.paybillsmalaysia.com tauka ruai siber MPP http://mpp.gov.my.
Ba kaul ke bukai, Lo ngansak mensia mayuh bela ngemataka ‘BHR Padawan Nature Challenge 2012’ kenaka 1 Julai tu ba Kampung Annah Rais enggau Borneo Highlands Resort.
Pekit ninting taun kelima kali diadu tu nyendiaka empat kategori besai iya nya MPP Chairmain Challenge Trophy (tebuka), Malta Penrissen Summit Trekking Challenge (tebuka), Batu Panggah Trekking Challenge (tebuka) enggau Kalimantan View Trekking Challenge (tebuka ungkup orang indu).
Orang ke bulih lumur satu nyentuk lumur tiga ba pekit tu ila nerima perais mata duit sereta tropi kelimpah nerima setipikit.
Naka ke diatu, 91 tim udah nyanggup enggau pekit tu ti diatur MPP begulai enggau Borneo Highlands Resort (BHR).
<< Previous Entry - Next Entry >>
