KUCHING: Pengawa nganjung ai ngagai kandang endur ke kena tasah ketegal kemarau dikereja enggau proaktif sereta jampat ti enda ngira penyauh endur nyengkaum ulu engtigis.
Sapit Chairman Komiti Penyah Penusah Menua Tan Sri Datuk Amar Mohd Morshidi Ghani madah, riput ti madahka bantu bekal ai beresi ke laun nya berita enda amat.
Ku iya, tiap bengkah endur ti bisi penanggul suntuk ai deka diberi bantu enggau naka pengelengkas sekalika dianjung ngena lori tangki tauka ai irup dalam butul.
“Kami nyendiaka bantu bekal ai beresi, nya alai riput ti madahka kami enda meri bantu, nya enda amat.
“Bantu nya mungkur semua (orang ti suntuk bekal ai beresi) enda ngira alai,” ku iya bejaku ngagai pengarang berita ditu, kemari (ensana).
Iya mansutka penerang nya lebuh dipinta ngenang pasal kemarau ti benung nyadi ba Sarawak.
Morshidi nerangka, nyentuk ke 25 Jun tu tadi, bisi 626,541 litar ai beresi disadung ngagai 24,743 orang mayuh ti napi penanggul nya.
Nambahka nya, bisi 9,582 kutak ai irup dalam butul diberi ngagai orang ti diau ba kandang menua ti nadai penyambung jalai alun.
Kelimpah ari nya ku iya, bantu bekal ai beresi mega diberi ngagai 93 bengkah sekula ti napi pekara sama.
“Semua sekula udah diberi bekal ai beresi. Enti nyema bisi sekula ti bedau nerima bantu nya, jampat kenataika gerah ngagai kami,” ku iya.