Kereban nya muntang dibai mindah dikena mantis ai sungai ti keruh lebih agi di menua pesisir
JULAU: Yayasan 1Malaysia Development Berhad (1MDB) kemari bisi nyuaka 500 unit jerrycan ngagai 42 buah rumah panjai enggau 46 buah rumah ke nyembuah kediri ke betapi enggau penanggul ai beresi di sitak parlimen Julau.
Sapit Menteri Pemadah, Penyambung enggau Main Asal Malaysia Datuk Joseph Salang Gandum bejadika atur pengawa nya.
Salang madahka jerrycan, diimport ari United Kingdom berega RM2,000 siti, nguna teknologi nano dikena mantis ai, ku iya.
“Opis Menteri Pengerai udah ngemendarka ai ari tangki nya likun diirup,” ku iya ba pengawa nyerahka jerrycan ngagai sida ke bulih tangki nya di Julau enggau Pakan diatur ba balai raya Julau ditu.
Salang udah minta jerrycan nya maya penemuai Menteri Besai Datuk Seri Najib Tun Razak maya ke ngabang Gawai ngagai Rumah Jana Saweng di Batu Matop ditu kena 3 Jun tu tadi.
Iya madahka mayuh orang lebih agi sida ke bepanggai ba ai sungai betapi enggau penanggul ai beresi setegal pengamah ari aktiviti kayu batang enggau ladang lalu musin kemarau tu balat agi nambahka penanggul nya, ku iya.
Salang ti mega Kaban Parlimen (MP) Julau madah ngagai perintah deka ngerembai palan pemeresi ai di sitak Meluan ngambika ulih nyambung mayuh agi ai beresi ngagai penguna dia.
Ungkup Pakan, iya madahka palan pemeresi ai Bayong, Sarikei deka ditikika agi.
Dulu agi ba jaku ke dipansut iya, Zahari madahka jerrycan nya diberi kompeni luar.
“Tu projek kedua ke udah dipejalaika 1MDB di nengeri tu.
“Kami udah nyadung 500 buah jerrycan di Batang Lupar minggu nyin kemari,” ku iya.