Pengawa pemansik mantu nyungkakka tikas sosio-ekonomi rayat: Ishikawa

0

KUCHING: Pengawa pemansik ti dipejalaika pengelama lima taun ngagai raban bansa ke diau nebing sungai sepemanjai Tatau enggau Kemena di nengeri tu dipelaba ulih mantu nyungkakka tikas sosio-ekonomi mensia mayuh kandang menua nya.

Projek nya berengkah dipejalaika taun 2010 ulih 10 iku sainstis rampa enggau rama Jipun ti deka nyendiaka riput penudi ngagai Gerempung Kampung Sarawak (SFC) nyadika chuan perambu jemah ila.

Professor Dr. Noboru Ishikawa ti nyadi ketuai pemansik nya madah, pansik sida ngemeranka transformasi iya nya ngubah ekonomi ari ti ngereja pengawa asal ngagai bejalaika kebun bedandang besai betanam betupi baka lada, getah enggau kelapa sawit.

Iya bejaku munyi nya ba aum pengarang berita pengudah Ketuai Pemesai Eksekutif SFC, Ali Yusop bejadika licha ‘Human Nature Interaction of the Riverine Societies in Sarawak- A Transdisciplinary Approach’ ti diatur ba sebengkah hotel ditu, ensana.

Licha nya diatur begulai Universiti Kyoto, Universiti Malaysia Sarawak (UNIMAS) enggau SFC, lalu pengawa pemansik nya dipelanja Japan Society for the Promotion of Science, Opis Menteri Pelajar Jepun.

Taja pia ku Ishikawa ari Centre for Southeast Asian Studies, Kyoto University madah, tuju penatai raban nya keterubah ukai baka ke patut iya nya nyungkak tikas pengidup. Tang ku iya, pekara nya pansut ba pengujung pengawa pemansik.

Iya ti mulaika pengingat ngena perau ba sepemanjai dua sungai nya madah “amat jauh ari Kuching ngagai Bintulu” sereta kandang menua nya di ulu engtigis, raban pemansik ngasaika pemar tang bisi tuju.

Dulu ari nya, Ali madah pemutus pengawa pemansik nya deka meri input ti ulih mai pemansang ngagai nengeri tu.

“Pansik nya pasal kaul mensia enggau macham utai ba genturung pendiau di sepemanjai sungai.

“Licha seharitu (ensana) iya nya bejuraika asil pansik, pasal takah ti patut dikemanah ba sepemanjai jalai.”

Nambahka nya, nyadi penyaga kampung di Sarawak, Ali madah SFC deka majak nyaga sereta ngatur kampung enggau manah ngambika meri pemanah ngagai raban bansa enggau rebak baru jemah ila.

“Tanah tu ukai kami empu, tang kitai nginjau ari rebak baru.”

Iya besemaya perintah deka meri kelala atur kereja ngintu pemanah kampung ti meruan sereta tegap.

“SFC angkun bejalaika tanggung pengawa dikena nentuka industri kampung di Sarawak diatur enggau meruan setipak enggau atur antarabansa.”