Home - Utusan Borneo - Berita Iban - Begempung ngatur pengawa ulih ngenegapka juluk
Begempung ngatur pengawa ulih ngenegapka juluk
by Rengenyan Labang. Posted on July 4, 2012, Wednesday
NEMUAI: Raban Indu SPDP Pampang Pending nemuai ngagai Mawan (tengah), ti diuluka Winnie (semilan kiba) enggau Wendy (tujuh kiba). — Gambar Jeffery Mostapa
KUCHING: Begempung ngatur pengawa tauka aktiviti ulih ngenegapka komponen parti Barisan Nasional (BN), lebih agi maya napi pengawa bepilih besai Ke-13 (PRU 13) ti deka datai.
Presiden Parti Demokratik Progresif Sarawak (SPDP) Tan Sri William Mawan Ikom madah, penyerakup empat parti komponen BN ti nyengkaum SPDP, Parti Rayat Sarawak (PRS), Parti Sa’ati Rayat Sarawak (SUPP) enggau Parti Pesaka Bumiputera Bersatu (PBB) ulih ngemujurka langgur pemansang ti dibai perintah.
“Kelimpah ari ti ngatur pengawa kediri, kitai amat meransang kompenen parti BN (SPDP, PRS, SUPP enggau PBB) begempung ngatur pengawa, laban tu ulih mantu ngenegapka juluk sereta strategi komponen BN.
“Enti ngatur pengawa begulai kitai lebih beserakup, kaban (parti) sereta rayat mega deka lantang ati,” ku iya.
Mawan ti nyadi Menteri Pemansang Rama bejaku ngagai pengarang berita lebuh ti nerima penemuai Raban Indu SPDP Pampang Pending bekaul ‘Night With P.195 & P.196 Friends’ ba opis iya ditu pagi kemari.
Program ti ngena rambai jaku ‘Best Friends Forever Charity Movie Night’ diatur Raban Indu SPDP Pampang Pending begulai enggau Raban Indu SPDP, PRS, SUPP enggau SPDP.
Ngenang pengawa ti diatur begulai ku iya, nya nunjukka raban indu enggau nembiak SPDP udah besedia sereta berinsur mansang ke mua.
“Kami SPDP selalu nyukung sereta meransang rebak baru (dalam politik) ngatur pengawa, tu nunjukka sida bebendar sereta udah besedia meri sukung ngagai parti,” ku iya.
Penemuai raban nya kemari diuluka Tuai Raban Indu SPDP Pampang Pending Winnie Lim sereta disempulang sapit iya ke mega nyadi chairperson pengatur Wendy Earnest Sadan sereta kaban parti nya kebukai.
<< Previous Entry - Next Entry >>
