Home - Utusan Borneo - Berita Iban - Kes pasung ba Sarawak nambah 26 persin
Kes pasung ba Sarawak nambah 26 persin
Posted on July 4, 2012, Wednesday
KUCHING: Sarawak nunjukka penambah 26.4 persin kes pasung berengkah ari bulan Januari ngagai Jun taun tu enti dibandingka enggau timpuh ke sama taun nyin kemari.
Taja pia, Tuai Opis Pemansik Penyalah, SAC Datuk Zulkifli Hassan madah, taun tu bisi 68 kes lalu taun nyin kemari bisi 84 kes.
Nitihku iya, tebal agi kes pasung nyadi ukai dipejal tang orang ti disangka enggau orang ke kena tuntung penusah (kena pasung) ngelala diri sama diri.
“Penyalah masung tu pedis deka dipelaba lalu tebal agi orang ti dituntung penusah tu iya nya indu ti baruh umur.
“Kes tu ukai pasung pejal laban orang ti disangka enggau orang kena pasung bekelala,” ku iya.
Iya bejaku ngagai pengarang berita pengudah Perhimpunan Bulanan Pesuruhjaya Polis Sarawak ditu, kemari.
Berindik ari nya iya ngelalau tiap iku apai indai tauka pengibun patut nukuka pengawa ti dikereja anak sida kena nyeliahka ari dituntung penusah nya.
Ngenang penyalah indeks di nengeri tu,Zulkifli madah,bisi nurun 11.67 persin tauka 673 kes dicatitka nyentukka tengan taun tu.
“Nyauka semua kes penyalah nyengkaum enchuri kerita enggau mutosikal nunjukka bisi nurun,” ku iya.
Dulu ari nya lebuh bejaku, Tuai Polis Sarawak DCP Dato’ Acryl Sani Abdullah Sani ngarapka semua pemesai enggau raban polis ngangkatka pemanah sereta gawa bebendar ari ngambika trend penyalah nurun.
“Ba pelilih menua ti agi nunjukka penambah penyampau penyalah indeks taun tu, tuai polis pelilih menua patut mansik sereta beratika chara dikena nurunka penyampau penyalah nya,” ku iya.
<< Previous Entry - Next Entry >>
