Nasit seiku penyidi deka diperunding: Mawan

by Jacqueline David. Posted on July 4, 2012, Wednesday

BESEMAYA BERUNDINGKA NASIT AWANG: Mawan begambar enggau Awang (tengah) lalu sama diuluka Mohd Johari (kanan).

KUCHING: Nasit seiku Penyidi bansa Iban ke suba (Ex-Treker), Awang Raweng ari Nanga Skrang, ke udah nerima midul George Cross, pangkat pemerani pemadu besai ba gelar  soldadu British, deka diberi kelai Perintah Menua.

Menteri Kanan Sarawak ti mega Menteri Pemansang Rama Tan Sri William Mawan madah, perintah menua deka betatika nasit Awang ke kala nyadi Bujang Berani belaban enggau komunis di ‘Malaya’ (sebedau Malaysia) suba ngambika pemerani iya ke udah nyaga pengelikun menua sereta berambun nyawa  ngelaban munsuh dikelala perintah.

Ketegal pemerani iya ke berambunka nyawa ngelaban munsuh di Kluang, Johor urung taun 1948 begulai enggau soldadu British, Awang diberi midul ‘George Cross’, iya nya siti midul ke pengabis besai diberi ngagai Bujang Berani ari baruh gempung menua Commonwealth.

“Perintah deka beratika nasit Awang ngerunding chara perintah tau nulung iya. Perintah sigi betatika utai baka tu lebih agi bala soldadu ke udah nyaga pengelikun menua,” ku iya madah ba aum media sepengudah betemu enggau Awang di opis iya ditu, kemari.

Ke diatu ku Mawan, Awang nerima elaun ari perintah RM2,000 enggau elaun nyadi Tuai Rumah, RM450.

‘Tang bisi mega orang bukai ke teulihka midul pengabis besai baka Awang tang bantu ke diterima mayuh agi ari Awang. Kami (perintah) enggai ngasuh iya berasai enda dikeibuh, sereta nampak nempayaka pemerani iya baka ke enda dibasa, laban enggaika pekara tu nyadi isu besai jemah ila.

“Ketegal pemerani iya, Awang diberi midul berani George Cross. Diatu umur iya udah manggai 83 taun tang iya nadai midul Seri Pahlawan (SP) tauka Pingat Gagah Berani (PGB), iya nya gelar ke pengabis besai di Malaysia,” ku iya.

Ku Mawan nandu, Perintah sigi betatika pengawa soldadu tauka Treker Iban tauka Sarawak Rangers ke udah berambunka nyawa nyaga pengelikun menua ari ke dianchurka kominis.

“Nya alai, kami (perintah) deka berunding ni baka elaun ke patut diberi ngagai Awang, tanda terima kasih perintah ngagai orang baka iya.

“Kami nemu penyampau elaun ke diterima iya semina RM2,000 ke jauh mimit ari orang bukai…Enggaika utai bansa tu nyadi penanggul ila lebih agi ba orang ke udah nyaga pengelikun menua,” ku iya.

Iya madah, penerima gelar bintang berani George Cross enda mayuh ke agi idup. Nya alai ku Mawan, opis iya deka bejuraika pekara tu enggau Sekretari Besai Perintah Menua (SS) chara meri kelai ungkup pemerani Awang ke udah nyaga pengelikun menua.

“Enti ulih, ngambika ba tiap atur pengawa ke bisi bekaul enggau atur pengawa pengerami menua tu, Awang enda ditinggalka.

Nya alai pengudah baum enggau SS ila, maya tiap pengerami renggat perintah menua, kami deka mai iya ke basa orang baka iya,” ku Mawan.

Kelimpah ari nya mega, iya madah deka nulis surat ngagai ‘Tokoh Warisan’ ngambika nama Awang ulih dipasuk ke dalam lis nama orang ke agi idup ke kala betempuh enggau munsuh maya Perintah Bekurung suba.

Mawan nambah baru, bisi dua iti pekara ke deka di kemutarka mantu Awang, iya nya nemuai ngagai rumah Awang empu di pelilih menua Sri Aman, lalu meda gaya pendiau iya ba rumah panjai, lalu berindik ari nya meda bakani ku gaya tulung ke ulih di adu Perintah ngagai iya.

“Aku empu deka ngagai rumah panjai Awang empu lalu berundingka chara deka ngemanahka agi pengidup iya,” ku iya ke ngelalau nembiak menua tu nunda chunto pemerani Awang sereta komitmen sida iya ngagai menua.

Taja pen sebedau nya, Awang bisi madahka peneka iya berumah di pasar Sri Aman laban gaya pendiau iya diatu ke kurang pengerai, kebuah iya minta bantu perintah meri sebuah rumah kos murah ngagai iya.

“Kami berunding dulu beratika chara ngemanahka agi pengidup Awang, baik nya diau ba rumah panjai ke semina setengah kilometer ari sekula. Enti jalai nuju rumah panjai di Nanga Skrang udah manah, nyangka pendiau iya ulih dikemanahka agi.

“Tang taja pia, kami mega berunding deka meda sekeda rumah baka dikedeka iya, lalu merambu ngagai perintah nyengkaum pengelantang  bukai ngambika utai ke diulih iya sebaka enggau orang bukai ba pangkat ke sebaka,” ku iya.

Iya madah baru, enti sema bisi peluang bukai, nyangka perintah deka berunding meri iya gelar ari menua tu empu baka ke kala diberi perintah British ngagai iya.

“Lebuh nya perintah British meri iya gelar bintang berani George Cross laban kelia iya gawa enggau soldadu British di Kluang, Johor. Nya alai, utai baka tu (baka gelar) enti enda diperatika kitai baka ke nempaya pemerani iya,” ku iya.

Entara basa ke diterima Awang diatu, laban iya seruran dikeingatka ngelawa menua United Kingdom tiap dua taun sekali maya Hari Pengada Queen Elizabeth, seagi-agi iya idup.

Dalam menua tu, Awang semina sekali aja dibai ngulu pengerami Hari Kebangsaan dalam taun 2005, lalu sebedau sereta nangkan nya, endang enda kala.

Ba pekara ke sama nya mega, Mawan ditanya enti Perintah Menua udah netap deka ngidupka baru Sarawak Rangers nyadi ‘Ceremonial Unit’.

Ku iya, pekara nya agi dipejuraika lalu siti pekara ke berat ke patut ditimbang laban ‘Sarawak Rangers’ tu nyadi kelai pemerani soldadu Sarawak, baka Johor ke bisi ‘ceremonial unit’ sida empu.

“Sarawak Rangers enggau Treker Iban orang ke sigi landik beperang dalam kampung, nya alai enti ulih kitai agi deka mulaika raban tu laban sida tu meh ke ngasuh kitai temegah ati.

“Perintah pen tau berunding ngaga Sarawak nyadi menua ke tau endur ngelatih soldadu beperang dalam kampung tauka ngaga siti unit perang dalam kampung,” ku iya.

Sama bisi nguluka Awang betemu enggau Mawan, iya nya Sekretari Besai Gerempung Veteran Sarawak Rangers (SRVA), Kapt. Mohd Johari Ibrahim (B), Direktor Opis Hal Ehwal Veteran Soldadu, Lt Monday Juhit, enggau seiku raban SRVA Corp Stanley Oscar Bryan (B).

<< Previous Entry - Next Entry >>

Comments are closed.