Home - Utusan Borneo - Berita Kadazan - Mogigiyon Kg Rumantai mokiwonsoi do sikul tosiriba
Mogigiyon Kg Rumantai mokiwonsoi do sikul tosiriba
Posted on July 18, 2012, Wednesday
RANAU: Mogigiyon Kampung Rumantai, 87 Kilometer mantad kakadaian diti mokianu doid koporintaan maya Komontirian Balajaran Malaysia om Koupisan Balajaran Pogun Sabah songowian Upis Balajaran Watas Ranau, tuh kaanu monimbang aplikisin lobi 300 mogigiyon kampung dino montok momonsoi do iso sikul tosuriba (Sikul Kabansaan) montok kounalan tanak ngawi id kampung dino.
Moboboros mogigiyon Kg Rumantai, Cassius Clay Gustan minomisunud, surat upalai poimbida montok pamansaian sikul id kampung dino nowonsoi noh om pinataak doid Koupisan Balajaran Pogun Sabah miampai kalansanan kaanu sokodung om pisokodungan di kangaam kopio montok pataakon doid boogian Komontirian Balajaran Malaysia.
“Upalai dino nogi akatahak no dagai om nakaanu sokodung tosonong mantad Montiri Ponombuluian, Koubasanan om Kinoiyonon Posorili ih nogi Exco Balajaran Pogun Sabah, Datuk Masidi Manjun om Montiri Kotundaan Labus Kakadaian, Datuk Dr Ewon Ebin,” ka di Cassius id iso kopoilaan media id Ranau konihab.
Tumanud Cassius, baino diti bulun noh wookon tanak ngawi id kampung dino kaanu balajaran, sabap sikul ih haro SK Miruru ih poinsumpak lobi 5 Kilometer mantad Kg Rumantai kapanahak do kobolingkangan kumaa tanak ngawi montok rumikot id sikulan sabap sansagan mamanau kakod sumorut talun om sumoborong piipiro bawang ih koligogon kopio kumaa diolo.
“Id kampung dino nogi kakaal okurangan mantad kawo projek kotundaan ‘infrastruktur’, momoguno do pongintangan mantad tinan pointantu,” ka di Cassius mikuo pinopokito do surat aplikisin poimbida dino kumaa monunurat.
Pinosunud dau, haro tangaanak kuminam mamanau kakod rumikot id SK Miruru, katapi sansagan poguluian kawagu sabap bawang ih soboronongon diolo asaru koliud om aiso ‘jambatan gantung’.
“Mokianu yahai kumaa koupisan ngawi haro koompitan toiko buruan ngawi tuh rumikot sondiri mongoi intong om rumuba osuau miampai mogigiyon Kg Rumantai om tumilombus maganu laang ngawi panalasaian tosonong montok manalasai kobolingkangan ih notoguang do mogigiyon,” kawagu di Cassius miampai noponu kalansanan.
<< Previous Entry - Next Entry >>
